Idman.biz
"Sumqayıt" klubu ölkədə basketbolun inkişafı və rəqəmsallaşması istiqamətində maraqlı və innovativ addım atıb.
"Gənclik şəhəri" təmsilçisi ilk dəfə NFT (rəqəmsal kolleksiya) layihəsi həyata keçirməklə həm texnologiyadan yararlanmağa, həm də azarkeşlərlə daha interaktiv ünsiyyət qurmağa çalışır. "Basketball Legends of Sumgayit" adlanan NFT kolleksiyası Ethereum blokçeynində ERC-1155 standartı ilə hazırlanıb və dünyanın ən məşhur NFT platformalarından biri olan opensea.io saytında 0.35 ethereum (təxminən 1.175 dollar) qiyməti ilə satışa çıxarılıb.
Layihə ilə "Sumqayıt"ın direktoru Elnur Quliyev offsideplus.az saytına müsahibəsində daha geniş məlumat verib.
- NFT ideyası necə yarandı? Bu təşəbbüs haradan qaynaqlandı?
- Son illərdə dünyada idman sahəsində rəqəmsallaşma sürətlə inkişaf edir və düşündüm ki, biz də bu trendlərə uyğun hərəkət etməliyik. Xüsusilə azarkeşlərlə daha yaxın, interaktiv və müasir bir əlaqə yaratmaq istəyirdik. NFT yaratmaq təşəbbüsü həm texnologiyanın imkanlarından yararlanmaq, həm də "Sumqayıt" klubu barədə fərqli formada paylaşmaq istəyimizdən yarandı.
- Azərbaycanda ilk basketbol klubu kimi bu təşəbbüslə çıxış etməyiniz digərləri üçün də nümunə ola bilərmi?
- Əsas məqsədimiz ölkəmizdə basketbolu sevdirmək, populyarlaşdırmaq və inkişaf etdirməkdir. NFT yaratmaqda hədəflərimizdən biri də idman sektorunda innovativ yanaşmalara yol açmaq və digər idman klublarını da bu sahəyə təşviq etməkdir. NFT təkcə texnoloji yenilik deyil, eyni zamanda marketinq və azarkeşlərlə əlaqədə yeni bir mərhələdir. Ümid edirik ki, bu addım başqa klublara da nümunə olacaq və ölkədə idmanın rəqəmsal inkişafına töhfə verəcək.
- NFT-lərə maraq nə dərəcədə oldu? Və bu layihəyə marağı artırmaq üçün hansı işləri görməyi planlaşdırırsınız?
- İlk mərhələdə NFT-lərimizə maraq əsasən basketbolsevərlər və texnologiyaya marağı olan tələbələr və gənclər tərəfindən oldu. Lakin biz bunu daha geniş auditoriyaya çatdırmaq üçün növbəti mövsümdə xüsusi kampaniyalar, sosial media layihələri və azarkeşlərlə canlı görüşlər təşkil etməyi planlaşdırırıq. Eyni zamanda, NFT sahiblərinə müəyyən eksklüziv imtiyazlar təqdim etməklə bu marağı daha da artırmağı hədəfləyirik. Xüsusilə, Sumqayıt şəhərində yerləşən tədris müəssisələrində rəqəmsal texnologiyalarla bağlı maarifləndirmə tədbirləri keçirməyi planlaşdırırıq.
- NFT-lər gələcəkdə klubun maliyyə dayanıqlılığına hansı şəkildə töhfə verə bilər?
- İlkin mərhələdə NFT-lərə gəlir mənbəyi kimi baxmaq hələ çox tezdir. Lakin təcrübə göstərir ki, NFT kolleksiyalarının satışında əlavə qazanc əldə etmək perspektivləri var. Adətən NFT satışlarından əldə olunan gəlir klubun gənclər proqramlarına, akademiyasına və marketinq fəaliyyətlərinə yönəldilir. Bu, alternativ gəlir mənbəyi kimi də faydalı ola bilər.
- Özünü doğruldacağı təqdirdə, NFT sahiblərinə hansısa eksklüziv üstünlüklər verməyi düşünürsünüz?
- Bəli, bu istiqamətdə planlarımız var. NFT sahiblərinə gələcəkdə oyunlara pulsuz giriş, klubun tədbirlərinə dəvət, xüsusi fan məhsullarına endirim və ya yalnız NFT sahibləri üçün hazırlanmış rəqəmsal kontent kimi üstünlüklər təqdim etməyi düşünürük. Bu, həm azarkeşin Sumqayıt klubuna bağlılığını artıracaq, həm də NFT-lərin real dəyərini daha da gücləndirəcək.
- Bu layihədən başqa digər hansı rəqəmsal innovasiyalarla bağlı planlarınız var?
- NFT bizim üçün bir başlanğıcdır. Gələcəkdə interaktiv mobil tətbiqlər, virtual reallıq (VR) ilə azarkeş təcrübəsi və rəqəmsal fan zonaları kimi layihələr üzərində işləməyi planlaşdırırıq. Məqsədimiz, "Sumqayıt" basketbol klubunu yalnız idman uğurları ilə deyil, eyni zamanda texnoloji yenilikləri ilə də tanıdan bir klub halına gətirməkdir.
- NFT-lərlə bağlı maarifləndirmə işləri aparmaq fikriniz var?
- Bəli, məktəblərdə və universitetlərdə seminarlar, sosial şəbəkələrdə sadə dildə videolarla bu sahəni tanıtmaq fikrindəyik. NFT sadəcə texnologiya deyil, yaradıcılıq və mülkiyyət hüququnun yeni formasıdır.
- Azərbaycanda NFT və digər yeni texnologiyaların gələcəyini necə qiymətləndirirsiniz?
- NFT, Web3, Blokçeyn kimi texnologiyalar hələ ki, yeni inkişaf etməkdədir. Yaxın gələcəkdə hüquqi çərçivələrin formalaşması bu sektorun daha da geniş yayılmasına kömək edəcək. Biz də bu prosesin önündə olmaq istəyirik. Bu istiqamətdə Azərbaycan Basketbol Federasiyasının bizə göstərdiyi etimad və dəstəyi yüksək qiymətləndiririk.
İdman.biz
