Idman.biz
Azərbaycan çempionu "Azərreyl"in puerto-rikolu voleybolçusu Nayka Benitesin AZƏRTAC-a müsahibəsi
- "Azərreyl"in heyətində keçirdiyiniz ilk mövsümdə Azərbaycan çempionu oldunuz. Təəssüratlarınız necədir?
- Bu mövsüm bizim üçün çətin keçdi. Zədəli oyunçularımız çox oldu. Heyətdə də müəyyən dəyişikliklər baş verdi. Komandanın öz oyununu tapması çətin idi. Rəqiblərimiz ötən ilin sentyabr ayından birgə hazırlıq keçirdi, lakin biz isə bu ilin yanvarından tam heyətlə məşq edirdik. Ona görə də çempionluq bizim üçün xüsusi oldu. Xoşbəxtəm ki, buradakı ilk mövsümümdə kubok qazandım. Uğurumuzda hər kəsin əməyi var.
- Finalın ilk oyununda "Abşeron"n 0:3 hesabı ilə məğlub olduqdan sonra bir çoxları geridönüş edəcəyinizi gözləmirdi...
- Mövsüm ərzində "Abşeron"a qarşı keçirdiyimiz oyunlarda qalib gəlməmişdik. Hamı onların bu il çempion olacağına inanırdı. Həqiqətən də rəqibin güclü heyəti var. Bu səbəbdən qızıl medallara əsas favorit hesab olunurdular. Birinci final matçından sonra komanda bir araya toplandı və "daha bir şansımız var, itirəcək heç nəyimiz yoxdur" dedik. Baş məşqçi Paolo Tofoli mövsüm ərzində bizə hər görüşün bir hekayə olduğunu və istənilən nəticə ilə üzləşə biləcəyimizi söyləyirdi. O, voleybolçularına hər zaman inanır. Bu, ən önəmli faktordur. İkinci qarşılaşmadan həzz almağa çalışdıq. Mövsümün son oyununa çıxırdıq. Birinci matçı unutmuşduq. Özümüz üçün yeni səhifə açdıq. Meydanda əla enerjiyə sahib komanda var idi. Hiss etdim ki, vəziyyəti öz xeyrimizə dəyişə biləcəyik. Elə də oldu, biz bunu bacardıq.
- Legioner oyunçu kimi, Azərbaycan Yüksək Liqasının səviyyəsi barədə nə deyə bilərsiniz?
- Bu mövsüm çox maraqlı oyunlar keçirdik. Azərbaycan Voleybol Federasiyasının yeni mövsüm üçün yaxşı planlar qurduğunu eşitmişəm. Liqanız inkişaf edir.
- Növbəti mövsümdə də "Azərreyl"də qalmağı düşünürsünüz?
- Bəli, yenidən bu kluba qayıdacağam. Burada çox yaxşı təcrübə topladım. Hər kəs mənə xoş münasibət göstərir. Ona görə gələn mövsümdə də "Azərreyl"də olacağam.
- Azərbaycan və Bakı şəhəri haqqında fikirləriniz necədir?
- Bura gəlmədən öncə Azərbaycan haqqında çox bilmirdim. Ölkənizdə nələr edə biləcəyimi fikirləşirdim. Vətənim Puerto-Rikodan uzaqda olmaq, fərqli mədəniyyəti olan ölkədə yaşamaq qəribə gəlirdi. Lakin komanda yoldaşlarım və digər şəxslər mənə dəstək oldular. İndi isə Bakıda xoşbəxtəm. Ən sevdiyim yer İçərişəhərdir. Orada tarixi abidələr var.
- Bir neçə gün əvvəl çempionluğu qeyd etmək üçün komanda ilə birgə Lənkərana getmişdiniz. Azərbaycanın cənub bölgəsində nələri bəyəndiniz?
- Lənkəranın möhtəşəm təbiəti var. Ora mənə ölkəm Puerto-Rikonu xatırladır. Hər andan zövq aldım.
İdman.biz
