Idman.biz
"Ard-arda 3 turnirdə oynamaq artıq mənim üçün çətindir".
Bunu İdman.biz-ə Azərbaycan şahmatçısı Azər Mirzoyev deyib.
O, Kubada və Baham adalarında keçirilən son turnirlərdə çıxışını dəyərləndirib: "May ayında Kubada Kapablanka və Garcia memoriallarinda iştirak etdim. Baham adaları Kubaya çox yaxın olduğu üçün orada keçirilən turnirdə də iştirak etmək qərarına gəldim. Kubadakı çıxışım uğurlu oldu. "Orjan Lindroth Memorial" haqqında isə bunu deməzdim. Turnir ərzində 3 oyunda uduzdum - bu da çoxdur. Halbuki Kubada iki turnirdə 18 oyun keçirdim və heç birində məğlub olmadım. Orada günə bir oyun olurdu, Baham adalarında isə günə iki tur keçirilirdi. Yəni yorğunluq amili də öz sözünü dedi".
Qrossmeyster gələcək planlarından da danışıb: "Payızda gənc və yeniyetmələrin Avropa və dünya çempionatı olacaq. Növbəti aylarda yığmanın şahmatçılarını bu yarışlara hazırlaşdırmağı düşünürəm".
Qeyd edək ki, Mirzoyev Baham adalarının Nassau şəhərində keçirilən "Orjan Lindroth Memorial"da 9-cu yeri tutub.
Aytac Sahəd
İdman.biz
