Report.az
Milli Olimpiya Komitəsinin (MOK) vitse-prezidenti Çingiz Hüseynzadə qanvermə aksiyasını böyük hadisə adlandırıb.
"Report" xəbər verir ki, o, bunu jurnalistlərə açıqlamasında deyib.
O, MOK-un inzibati binasında təşkil edilən aksiyada idmançıların iştirakını xüsusi vurğulayıb və bunun böyük hadisə oıduğunu bildirib.
"İyunun 14-ü Beynəlxalq Qan Donorları Günüdür. Eyni zamanda 10 il əvvəl Avropa Oyunlarının açılışı olub. Biz bu münasibətlə bu aksiyanı keçiririk. Gördüyünüz kimi, aksiyada ən görkəmli idmançılarımız, Olimpiya çempionlarımız, Avropa Oyunlarının qalibləri iştirak edirlər. Bu, bizim üçün həqiqətən böyük hadisədir".
Qeyd edək ki, MOK-un dəstəyi, Səhiyyə Nazirliyinin tabeliyindəki Respublika Qan Bankının və Azərbaycan Qan Donorluğunun İnkişafı Mərkəzinin birgə təşkilatçılığı ilə bu gün kütləvi qanvermə aksiyası təşkil olunub. Tədbirdə MOK rəsmiləri, idmançılar, həmçinin idman ictimaiyyətinin bir sıra nümayəndələri və digər rəsmi şəxslər iştirak edib. Aksiya talassemiyadan əziyyət çəkən uşaqlar üçün keçirilib.
"Həmrəy olaq, qanımızla yaşadaq" adlı aksiya 14 İyun - Beynəlxalq Qan Donorluğu Gününə həsr olunub.
