Idman.biz
Avropa Ədalətli Oyunlar Hərəkatının (EFPM) 30 illik yubileyi münasibətilə həyata keçirilən "Ədalətli oyun və sülh naminə Avropanı keçək" təşəbbüsü çərçivəsində azərbaycanlı idmançılar Bakıdan Brüsselə olan 3659 km-lik simvolik məsafəsini uğurla tamamlayıblar.
İdman.biz xəbər verir ki, bu məsafə ölkə üzrə müxtəlif idman növlərini (atletika - 2150 km, velosiped 1000 km, alpinizm - 210 km, taekvondo - 174 km, güləş - 85 km və üzgüçülük - 40 km) təmsil edən 62 idmançılar tərəfindən kollektiv şəkildə qət olunub.
Təşəbbüs Azərbaycan Milli Olimpiya Komitəsinin Ədalətli Oyunlar Komissiyası və Atletlər Komissiyasının birgə təşkilatçılığı ilə həyata keçirilib. İdmançılarımızın Avropa estafetinə cəlb olunmalarında əsas məqsəd ədalətli oyun, sülh və qarşılıqlı hörmət kimi dəyərləri təbliğ etmək olub.
Layihə təkcə idman bacarıqlarını deyil, həm də komandada işləmək, həmrəylik və idman ruhunu nümayiş etdirib.
Qeyd edək ki, layihə 19 may tarixində Yunanıstanın Olimpiya şəhərində keçiriləcək Dünya Ədalətli Oyunlar Günü ilə yekunlaşacaq.
İdman.biz
