Idman.biz
Almaniya yığması öz ölkəsində keçiriləcək Ümumdünya Universiadasında rekord sayda idmançı ilə təmsil olunacaq.
İdman.biz xəbər verir ki, ev sahiblərinin komandasında 305 idmançı yer alacaq.
Bu, Universiadalar tarixində indiyədək ən geniş heyətli Almaniya komandasıdır.
Almaniya Universitet İdmanı Federasiyası İdarə Heyətinin sədri Yorq Förster mötəbər tədbirə bütün dövrlərin ən böyük Almaniya yığması ilə qatılacaqlarından qürur duyduqlarını deyir: "Bu, Almaniyada tələbə idmanının artan əhəmiyyətini və iştirak edəcək bütün tərəflər arasında sıx və uğurlu əməkdaşlığı nümayiş etdirir. Reyn-Rur bölgəsində keçiriləcək Dünya Universitet Oyunları atletlərimizə idman nailiyyətlərini akademik karyera ilə birləşdirmək imkanı yaradır. Bu yarışlar Almaniyada universitet idmanının inkişafı üçün davamlı impuls verəcək".
Qeyd edək ki, Universiadanın açılış mərasimi sabah baş tutacaq.
Yarışda Azərbaycan komandası da iştirak edəcək. İdmançılarımız 12 idman növündə çıxış edəcəklər: atletika, badminton, oxatma, çimərlik voleybolu, bədii gimnastika, taekvondo, kayak və kanoe ilə avarçəkmə, üzgüçülük, stolüstü tennis, tennis, cüdo və qılıncoynatma.
İdman.biz
