Idman.biz
Rusiyalı fiqurlu konkisürən Veronika Jilina Azərbaycan pasportunu aldığını açıqlayıb.
İdman.biz xəbər verir ki, 16 yaşlı idmançı bu barədə sosial şəbəkə hesabında paylaşım edib.
Jilina paylaşımında karyerasının yeni mərhələsinə yeni ölkənin bayrağı altında başlamağa hazır olduğunu yazıb: "Əziz dostlar, narahatlığınız üçün hamınıza təşəkkür edirəm. Çoxunuz məlumatlısınız ki, mən ağır onurğa zədəsi almışdım və uzun müddətli müalicə olunmuşam, həmçinin bərpa prosesi keçmişəm. Bu səbəbdən də, iki mövsümdür (2023/24 və 2024/25) Rusiyada heç bir rəsmi yarışda iştirak etməmişəm və mən Rusiya millisinin üzvü deyiləm.
Ailəmin - anam və atam, bacım və məşqçim Yevgeni Viktoroviç sayəsində bütün sınaqlara tab gətirə bildim. Bilməyinizi istəyirəm ki, Rusiyaya və burada mənə köməklik göstərən hər kəsə çox minnətdaram, inkişafımda və idmançı kimi formalaşmağımda payı olanların töhfəsi və dəstəyini yüksək qiymətləndirirəm. Mən özəl akademiyada məşq etdim, amma həmişə özümü daha böyük fiqurlu konkisürənlər cəmiyyətinin bir hissəsi kimi hiss edirdim.
Artıq bir neçə ildir ki, həyatım Bakı ilə bağlıdır, bura tez-tez uçuram və bu yaxınlarda pasport almışam. Azərbaycan aşiq olduğum və ikinci vətənimi hesab etdiyim ölkədir. Burada çoxlu dostlar, həmkarlar qazandım. İndi təkcə ruhumla deyil, həm də ürəyimdə olan Azərbaycanı gələcəkdə təmsil etməkdən xoşbəxt olacağam. Yığmada çıxış etmək üçün icazəni səbirsizliklə gözləyirəm! Sabah mənim də 17 yaşım tamam olur və bu yeni yolda mənə dəstək olan hər kəsə çox minnətdaram".
Qeyd edək ki, bir gün əvvəl Rusiya Fiqurlu Konkisürmə Federasiyasının rəhbərliyi Jilinanın vətəndaşlığını dəyişməyə icazə verməyəcəyini və Rusiya yığmasının üzvü olduğunu açıqlayıb.
İdman.biz
