Idman.biz
"Hər şey çox yaxşı alındı. Çünki yeddi finaldan altısında medalçılar sırasında yer aldıq. Halbuki yarışdan öncə beş medal planlaşdırırdıq. Ona görə də nəticədən çox razı qaldıq".
İdman.biz bildirir ki, bu sözləri batut gimnastikası üzrə Azərbaycan millisinin baş məşqçisi Vladimir Şulikin yığmanın III MDB Oyunlarındakı nəticələrini dəyərləndirərkən deyib.
"Hətta qızların sinxron proqramında da medal götürə bildik. Halbuki sadəcə finala çıxmağı hədəfləmişdik. Amma elə oldu ki, yaxşı çıxış etdilər və üçüncü oldular. Ən əsası odur ki, idmançılarımız bizi məyus etmədilər. Hamı çox çalışdı. Həm qızlar, həm oğlanlar əllərindən gələni etdilər", - baş məşqçi bildirib.
Mütəxəssis güclü rəqiblərlə mübarizə apardıqlarını söyləyib: "Xüsusilə qeyd etmək istəyirəm ki, dünyanın ən güclüləri ilə yarışdıq. Rəqabət olduqca güclü idi. Rusiya və Belarusdan Olimpiya və dünya çempionları iştirak edirdi. Ona görə də xüsusilə Olimpiya proqramına daxil olan fərdi yarışda qələbə qazanmaq çox xoş oldu. Maqsud Mahsudov Olimpiya çempionunu məğlub edərək qızıl medal qazandı. Bu, çox sevindiricidir. İndi isə çalışacağıq ki, yolumuza davam edək. Növbəti hədəf "Los-Anceles-2028" Yay Olimpiya Oyunlarıdır".
Batut gimnastikası üzrə Azərbaycan millisi III MDB Oyunlarını 1-i qızıl, 2-si gümüş, 3-ü bürünc olmaqla ümumilikdə 6 medalla bitirib.
