Idman.biz
Tanınmış israilli gimnast, Tokio-2020 Yay Olimpiya oyunlarının çempionu Linoy Aşram Bakıya gələcək.
İdman.biz-in Azərbaycan Gimnastika Federasiyasının mətbuat xidmətinə istinadən verdiyi xəbərə görə, o, beynəlxalq "Winter Fairytale" turnirindən sonra Milli Gimnastika Arenasında gənc gimnastlar üçün master-klas təşkil edəcək.
Master-klas bu ilin 7 dekabrında saat 18:00-da keçiriləcək. Təlim proqramına həm nəzəri, həm də praktiki məşqlər daxil olacaq. Aşram iştirakçılara öz təcrübəsini, texniki biliklərini və incəliklərini ötürməyi planlaşdırır.
Qeyd edək ki, Linoy Aşram 13–19 oktyabr tarixlərində Bakıda Avropa Gimnastikasının təlim-məşq toplanışında dəvətli ekspert qismində iştirak edəcək.
Linoy Aşram 13 may 1999-cu ildə İsrailin Rișon-le-Siyon şəhərində anadan olub. O, Olimpiya Oyunlarında qızıl medal qazanan ilk israilli qadın və bədii gimnastika tarixində ölkəsinin ilk Olimpiya çempionudur. Tokio Olimpiadasında çoxnövçülük yarışında 107,800 xal toplayaraq rusiyalı Dina Averinanı qabaqlayıb.
Aşram karyerası ərzində dünya və Avropa çempionatlarında çoxsaylı medallar qazanıb: çoxnövçülükdə gümüş və bürünc, həmçinin ayrı-ayrı növlərdə mükafatlar əldə edib. 2022-ci ilin aprelində isə yarış karyerasını başa vurduğunu açıqlayıb.
Olimpiya çempionunun Bakıya gəlişi və master-klası mövsümün ən yadda qalan idman hadisələrindən biri olacaq, həm də Azərbaycan gimnastlarına böyük ilham bəxş edəcək.
