Report.az
Futzal üzrə Azərbaycan Yüksək Liqasında çıxış edən "Neftçi" İK-nın baş məşqçisi İlkin Hacıyev çempionluq şanslarını dəyərləndirib.
Mütəxəssis "Report"a açıqlamasında 2024/2025 mövsümünün qalibi olacaqlarına inandıqlarını bildirib.
O, son iki matçın çətin keçəcəyini vurğulayıb:
"Mövsümə yaxşı başlamışdıq. Sonradan İsa Atayevin zədələnməsi, bəzi futzalçıların komandadan getməsi və yeni gələnlərin uyğunlaşma üçün vaxta ehtiyac duyması işimizi bir qədər çətinləşdirdi. Bütün bunlara baxmayaraq, hazırda ikinci yerdəyik, "Araz-Naxçıvan"la arada 3 xallıq fərq var. Qarşıda biz iki çətin oyun gözləyir. "Araz-Naxçıvan" və "Baku Fire" ilə oynayacağıq. Həmin matçlara qələbə əzmi ilə çıxacağıq. Hər iki görüşdə əlimizdən gələni edəcəyik. Çempionluq üçün "Araz-Naxçıvan"ı daha çox top fərqi ilə məğlub etməliyik. Maksimum nəticəyə nail olmaq üçün bacardığımızı edəcəyik".
İ.Hacıyev hazırda heyətdə zədəli futbolçuların olmadığını deyib:
"Növbəti iki matça tam heyətlə çıxa bilərik. Düzdür, "Araz-Naxçıvan"la matça qədər bir həftə vaxt var. Amma hazırda hər şey qaydasındadır. Mövsümün sonuna yaxınlaşdığımız üçün psixoloji və fiziki baxımdan müəyyən yorğunluq ola bilər. Lakin ümid edirəm ki, futzalçılarımız zədələnməyəcək və növbəti görüşə optimal heyətlə çıxacağıq".
Qeyd edək ki, "Neftçi" İK hazırda Yüksək Liqanın turnir cədvəlində 18 turdan sonra 43 xalla ikinci pillədə qərarlaşıb. Komanda lider "Araz-Naxçıvan"dan cəmi 3 xal geridədir.
"Neftçi" İK mayın 22-də keçiriləcək XIX turda Naxçıvan təmsilçisi ilə üz-üzə gələcək.
