Namiq Məmmədkərimov: Milliyə inanıram, amma nəticə faciəvi idi

"Danimarka millisinin heyətinə nəzər salsaq, kifayət qədər təcrübəli futzalçılarının olduğunu görə bilərik. Çempionatlarında 10 komanda iştirak edir. Danimarka yığması ilə oyun heç də asan keçməyəcək. Buna baxmayaraq, həmişəki kimi millimizə inanırıq". Bunu Sport24.az-a açıqlamasında Azərbaycan millisinin sabiq futzalçısı Namiq Məmmədkərimov deyib.

Təcrübəli futzalçı millimizin Danimarka yığması ilə keçirəcəyi yoldaşlıq oyunlarından gözləntilərini açıqlayıb:

"Millimizin son İslam Oyunlarındakı çıxışı hamı kimi məni də qane etmədi. Milli olaraq Özbəkistana böyük hesabla uduzmağımız heç də xoş deyil. Düzdür, həmin vaxt "Araz-Naxçıvan" Çempionlar Liqasında çıxış edirdi, bəzi futzalçılar sonradan komandaya qoşuldu. Buna baxmayaraq, nəticə faciəvi oldu. Həvəsdən düşməli deyilik. Perspektivli oyunçular var. Onlar özlərini komandalarında göstərməlidirlər. O vaxtı millidə səviyyəli braziliyalı oyunçular çıxış edirdi. Onların haqqını danmırıq. Amma biz də boş dayanmırdıq, daim üzərimizdə işləyirdik. Olurdu ki, braziliyalılardan kimsə zədələnirdi, biz onu layiqincə əvəz edə bilirdik. Heç vaxt həvəsdən düşməmişik. İndi millidə yalnız Azərbaycanlı futzalçılar oynayır. Bunun özünün bir gözəlliyi var. Özünü yaxşı tərəfdən götərənlər həmişə yığmada oynaya bilər. Yoldaşlıq matçları nə qədər çox olsa, yaxşıdır. Millimizə uğurlar arzu edirəm".

Qeyd edək ki, milli yanvarın 22-də və 24-də Bakı İdman Sarayında Danimarka yığması ilə yoldaşlıq oyunları keçirəcək.