Sport24.az
Minifutbol üzrə millimizin dünya çempionu olması hamımızı sevindirdi. Futbolda daim uğursuzluğa düçar olduğumuzdan FİFA və UEFA-nın tanımadığı sahədə olsa belə, uğur qazanmağımız toy-bayram kimi qeyd olundu, el şənliyinə çevrildi. Çempionlar üçün şəhər turu təşkil olundu, xalq manıslarımızın və xarici estrada ulduzlarının iştirakı ilə pulsuz konsertlər keçirldi. Hamımız əl qaldırıb oynayırdıq, oynamağı bacarmayanlar isə "qonşudan qalma geri" prinsipini əldə tutaraq, ortaya çıxıb oynayanlara əl çalırdı. Telekanallar Elşad Quliyevin çalışdırdığı yığmanın uğurlu çıxışından silsilə verilişlər hazırladı, mətbuat futbolçularımızın xüsusi istedadını qabardıb, onları az qala Messi, Ronaldo, Yamal səviyyəsində futbolçu olduğunu dünya ictimaiyyətinin diqqətinə çatdırmağa çalışdı.
Milli üzvlərindən söz düşmüşkən, onlar üçün əsl bayram turnirdən sonra oldu. Eşitdiyimizə görə, Minifutbol Federasiyamız uca xalqımıza heç vaxt yaşamadığı həzz dəqiqələrini yaşatdığına görə, tarixi uğurun memarlarını mükafatlandırıb. Yalan-doğru, çempionluqda əməyi keçən, tribunaları dolduran azarkeşləri sevindirən futbolçularımızın hər birinə 40 min manat ənam verib. Bundan əlavə qrup mərhələsindən çıxmağın, mərhələ adlamağın bonusu da olub. Bir sözlə, dünya çempionatını ən yüksək səviyyədə təşkil etmək üçün dəridən-qabıqdan çıxan federasiya rəsmiləri əllərindən gələn hər şeyi ediblər ki, milli üzvləri mundialdan sonra rahat dincəlsinlər, istədikləri yerdə qəlyan çəksinlər, maşınlarını dəyişsinlər və s.
Ancaq yığma üzvləri dünya çempionu olandan sonra elə qaza gəliblər ki, gözləri heç kimi və heç nəyi görmür. Yayılan söz-söhbətə görə, şişirdilmiş qəhrəmanlar FİFA və UEFA-nın tanımadığı turnirdə qalib olduqlarına görə verilən mükafatdan razı düşməyiblər. Onlar indi dövlət başçısı tərəfindən federasiyanın inkişafına ayrılan 2 milyon manatdan da pay istəyirlər, bunun davasını edirlər.
Bu məsələdə kimin haqlı, kimin haqsız olduğunu deyə bilmərik. Ancaq görünən odur ki, bu gün üçün Minifutbol Federasiyasının rəhbərliyi pul üstündə futbolçularla kriminal dillə desək, "razborka" aparır. Sonda sevinən tərəf kimin olacağını proqnozlaşdırmaq fikrimiz yoxdu, amma məsələnin cəmi iki başı var: 1. futbolçulara əlavə pay söz verilibsə, niyə ödənmir?; 2. futbolçular sonradan iştaha gəliblərsə, haqlı tərəf Federasiyadı.
