Sport24.az
Azərbaycanın futzal millisinin üzvü Fərid Abbasov Danimarka yığması ilə keçirilən yoldaşlıq oyunları (1:4, 4:2) barədə danışıb. Sport24.az xəbər veirr ki, o, Azərbaycan Futzal Federasiyasının saytına açıqlamasında bu rəqiblə 2-ci yoldaşlıq görüşlərinin əla keçdiyini deyib:
"Əvvəlcə bizi dəstəkləmək üçün arenaya gələn azarkeşlərimizə təşəkkür edirəm. İki fərli oyun oldu. Birinci görüşdə səhvlərimiz həlledici oldu və rəqib bundan maksimum yararlandı. Yekunda məğlub olduq. Nəzərə alsaq ki, milli 8 aydan çoxdur oyun keçirmir, üstəlik, heyətimizə yeni futzalçılar da cəlb olunub, müəyyən qədər anlaşılandır. Baş məşqçi oyunu analiz etdi, bizə də səhvlərimizi göstərdi və ikinci oyun üçün təlimatlarını verdi. Bacardığımız qədər mübarizə apardıq, sonluq isə bizim üçün əla alındı".
Gənc oyunçu Danimarka ilə 2-ci matçda vurduğu qol və verdiyi qol ötürməsi haqda da danışıb:
"Bir qol vurmağım və məhsuldar ötürmə etməyim verilən tapşırıqları yerinə yetirməyimin nəticəsidir. Baş məşqçi hər zaman məsləhət bilir ki, əgər özünə, oyunçunu keçə biləcəyinə inanırsansa, cəhd elə, fərdi keyfiyyətlərindən istifadə et. Qolun ötürməsi zamanı da gördüm ki, rəqibi keçə bilərəm, sona qədər davam etdim. Bu qələbə gələcək oyunlar üçün açar oldu. Əsas odur ki, özümüzə inanaq və çox çalışaq".
Qeyd edək ki, Danimarka yığması ilə yanvarın 22-də keçirilən oyunda rəqib 4:1, 2 gün sonra - yanvarın 24-də isə baş tutan matçda Azərbaycan millisi 4:2 hesabı ilə qalib gəlib.
