Sport24.az
"Rəqibin kimliyindən asılı olmayaraq oyunlara ciddi hazırlaşır, məsuliyyətlə yanaşırıq. Çünki bura gələndə qarşımıza konkret tapşırıq qoyulub". Sport24.az xəbər verir ki, bunu "Araz-Naxçıvan"ın heyətində Çempionlar Liqasında ilk dəfə çıxış edən Ədalət Ələkbərov Azərbaycan Futzal Federasiyasının mətbuat xidmətinə açıqlamasında deyib.
Gənc futzalçı bildirib ki, "Araz-Naxçıvan" növbəti mərhələyə yüksəlməlidir: "Bunun üçün də yaxşı hazırlıq keçmişik. Artıq iki oyunda maksimum xal toplamışıq. Hər iki görüş məhsuldar olub".
Ədalət Ələkbərov debüt etdiyi Çempionlar Liqasının ab-havasından da danışıb:
"Komandanın ən gənc üzvlərindən biriyəm. Baş məşqçimiz daim nəzarətdə saxlayır. Hər iki oyunda şans verib. Bu cür yarışlarda qazanılan təcrübə əvəzsizdir. Çalışıram bu şansdan həm komandamın xeyrinə, həm də öz inkişafım üçün istifadə edim. Komandanın dəstəyini hiss edirəm, bu da gənc futzalçı üçün əvəzolunmaz stimuldur".
O, son oyuna da ciddi hazırlaşdıqlarını və qələbə qazanmaq üçün mübarizə aparacaqlarını vurğulayıb:
"Hazırda turnir cədvəlində liderik. Sabahkı oyundakı rəqibimiz də bizimlə eyni sayda xal toplayıb. Düzdür, bizi heç-heçə də qane edəcək. Ancaq qələbə qazanıb, qarşıya qoyulan məqsədə çatmaq üçün əlimizdən gələni edəcəyik. Meydan amili, azarkeş dəstəyi onların tərəfində olacaq. Ancaq Bakıda həm fiziki, həm də taktiki-texniki planda yaxşı məşqlər keçirdik. Onun bəhrəsini arxada qalan 2 oyunda gördük".
Qeyd edək ki, UEFA Çempionlar Liqasında çıxış edən "Araz-Naxçıvan" arxada qalan 2 oyunda maksimum xal toplayaraq turnir cədvəlinə başçılıq edir. Təmsilçimiz sabah Avstriya çempionu "Ljuti Krajişnici" klubu ilə gücünü sınayacaq. Bu görüşdə "qırmızı-ağlar"ı heç-heçə də qane edir.
