Idman.biz
İtaliya A Seriyasının 28-ci turunun mərkəzi qarşılaşmasında "Milan" derbisi baş tutub. "San-Siro" stadionunda keçirilən oyun "qırmızı-qaralar"ın 1:0 hesablı minimal qələbəsi ilə yekunlaşıb.
İdman.Biz xəbər verir ki, matçın taleyini 35-ci dəqiqədə vurulan yeganə qol həll edib. "Milan"ın müdafiəçisi Pervis Estupinan rəqib qapısına yol taparaq komandasına vacib üç xal qazandırıb. "İnter" üçün itki təkcə hesabla bağlı olmayıb; 68-ci dəqiqədə müdafiəçi Alessandro Bastoni zədələnərək meydanı vaxtından əvvəl tərk etməli olub.
Bu qələbə sayəsində xallarını 60-a çatdıran "Milan" turnir cədvəlində ikinci pillədəki mövqeyini möhkəmlədib və liderlə fərqi azaldıb. Məğlubiyyətə baxmayaraq, "İnter" 67 xalla hələ də İtaliya çempionatına liderlik edir.
23:44
İtaliya A Seriyasının 28-ci turu çərçivəsində keçirilən qarşılaşmada "Roma" səfərdə "Genoa"nın qonağı olub. Oyun meydan sahiblərinin 2:1 hesablı qələbəsi ilə başa çatıb.
İdman.Biz xəbər verir ki, matçda bütün qollar ikinci hissədə vurulub. 52-ci dəqiqədə "Genoa"nın hücumçusu Junior Messias penalti zərbəsini dəqiq yerinə yetirərək hesabı açıb. Cəmi üç dəqiqə sonra "Roma"nın müdafiəçisi Evan Ndika tarazlığı bərpa etsə də, paytaxt təmsilçisi xalı qoruya bilməyib. 80-ci dəqiqədə Vitor Oliveyra (Vitinya) vurduğu qolla genuyalılara qələbə qazandırıb.
Bu məğlubiyyətdən sonra 51 xalda qalan "Roma" turnir cədvəlinin beşinci pilləsindəki mövqeyini qorusa da, təqibçiləri ilə xal fərqi minimuma enib. 30 xal toplayan "Genoa" isə 13-cü sıraya yüksəlib.
20:22
İtaliya A Seriyasının 28-ci turu çərçivəsində keçirilən qarşılaşmada "Verona" səfərdə "Bolonya"nın qonağı olub. "Renato Dall"Ara" stadionunda baş tutan oyun qonaqların 2:1 hesablı qələbəsi ilə yekunlaşıb.
İdman.Biz xəbər verir ki, "Verona"nın heyətində Martin Frese və Kiron Boui vurduqları qollarla komandalarına vacib üç xalı qazandırıblar. Meydan sahiblərinin yeganə qoluna isə Conatan Rou imza atıb.
Bu qələbə "Verona" üçün xüsusi əhəmiyyət kəsb edir. Belə ki, komanda bu nəticə ilə İtaliya çempionatındakı 12 matçlıq qələbəsizlik seriyasına son qoyub. Hazırda 18 xalı olan "Verona" turnir cədvəlinin 19-cu pilləsində qərarlaşıb. "Bolonya" isə 39 xalla səkkizinci yerdədir.
Paralel keçən qarşılaşmasında "Fiorentina" və "Parma" üz-üzə gəlib. Florensiyada keçirilən matçda qapılara qol vurulmayıb - 0:0. Bu bərabərlikdən sonra "Fiorentina" 25 xalla 17-ci, "Parma" isə 34 xalla 12-ci pillədə yer alıb.
18:09
İtaliya A Seriyasında "sağ qalmaq" uğrunda mübarizə aparan iki komandanın gərgin qarşılaşmasında "Leççe" öz meydanında "Kremoneze"ni qəbul edib. Dramatik hadisələrlə yadda qalan oyun meydan sahiblərinin 2:1 hesablı qələbəsi ilə başa çatıb.
İdman.Biz xəbər verir ki, "Leççe" matçın ilk hissəsində aşkar üstünlük nümayiş etdirib. 22-ci dəqiqədə Qallonun künc zərbəsindən ötürməsini Pierotti başla tora göndərərək hesabı açıb. 38-ci dəqiqədə Biankettinin cərimə meydançasında topa əllə müdaxiləsindən sonra təyin olunan penaltini serbiyalı hücumçu Ştuliç dəqiq yerinə yetirərək fərqi ikiyə çatdırıb.
İkinci hissəyə Davide Nikolanın üçlü əvəzləməsi ilə başlayan qonaqlar dərhal fərqi azaldıblar. 47-ci dəqiqədə Federiko Bonazzoli komandasını ümidləndirib. Oyunun son dəqiqələri isə əsl xaosla yadda qalıb. Payero hesabı bərabərləşdirsə də, VAR müdaxiləsindən sonra topun əllə oynanıldığı məlum olub və qol ləğv edilib. Matçın son saniyələrində Falkone inanılmaz seyvlə Payeronun növbəti zərbəsini dəf edərək qələbəni qoruyub.
Bu nəticədən sonra xallarını artıran "Leççe" (27) təhlükəli zonadan uzaqlaşmaq yolunda böyük addım atıb – 16-cı pillə. Ardıcıl uğursuzluqlar yaşayan "Kremoneze"də (24) isə baş məşqçi Davide Nikolanın istefası gündəmdədir. Komanda 18-ci pillədədir.
