Sport24.az
"Sabah" UEFA Çempionlar Liqasında tarixi uğura imza atdı! Azərbaycan çempionunun qitənin bir nömrəli klub turnirindəki möhtəşəm yürüşü davam edir. "Qarabağ"ın illərdir yazdığı Avropa hekayəsinə indi "Sabah" da öz adını böyük hərflərlə əlavə etməyə başlayıb.
Əvvəlcə "Sabah"ı bu möhtəşəm nəticə münasibətilə təbrik etmək lazımdır. Əhsən! Komanda UEFA Çempionlar Liqasında debüt etdiyi mövsümdə II təsnifat mərhələsində Finlandiyanın "KuPS" klubuna da heç bir şans vermədi və iki oyunun nəticəsinə əsasən mərhələni inamla keçdi.
Beləliklə, "Sabah" Çempionlar Liqasındakı ilk mövsümündə artıq iki mərhələ adlayıb. Bu, özü-özlüyündə Azərbaycan futbolu üçün böyük hadisədir. Üstəlik, bu nəticə ilə komanda ən azı UEFA Konfrans Liqasının liqa mərhələsində iştirakını təmin edib. Yəni "Sabah" qarşıdakı aylarda da Avropanın klub futbolunun ən böyük səhnələrindən birində mübarizəsini davam etdirəcək.
"Sabah"ın avrokubok mövsümünü artıq indidən uğurlu adlandırmaq olar. Təbii ki, hər bir futbolsevər bundan daha artığını arzulayır. İndi hamımızın gözü qarşıdakı mərhələdədir və "Sabah"ın yoluna harada davam edəcəyini səbirsizliklə gözləyirik. Amma komanda bundan sonrakı mərhələdə mübarizəni dayandırsa belə, düşünmək olar ki, bu mövsüm Azərbaycan futbolunun tarixində "Sabah" üçün uğurlu avrokubok mövsümü kimi qalacaq.
Ən vacibi isə odur ki, "Sabah" bizə qışa qədər avrokubok həyəcanı yaşadacaq. Bu, həm klub, həm futbolçular, həm də azarkeşlər üçün çox böyük təcrübədir. Azərbaycan futbolunun avrokuboklarda uzun müddət mübarizə aparan komandalarının sayı o qədər də çox deyil. "Qarabağ" bunu artıq illərdir ən yüksək səviyyədə edir. Bundan əvvəl "Neftçi" və "Qəbələ" də avrokubok mövsümünü qışa qədər davam etdirə bilmişdi. İndi isə bu siyahıya "Sabah" da öz adını yazdırdı.
Komandanın Azərbaycan çempionu olması barədə yazarkən də qeyd etmişdik ki, "Sabah"ın qazandığı çempionluq təsadüfi nəticə yox, illər ərzində qurulan sistemli işin və düzgün strategiyanın bəhrəsidir. İndi isə həmin sistemin nəticələrini Avropada da görürük. Komanda addım-addım böyüyür, təcrübə toplayır və artıq beynəlxalq arenada da öz sözünü deməyə başlayır.
Bu gün "Sabah"ın qarşısında yeni bir səhifə açılıb. Çünki komanda UEFA Çempionlar Liqasında meydana çıxdığı ilk dörd oyunun hamısında qələbə qazanıb. Dörd oyun, dörd qələbə! Azərbaycan futbolu üçün bu, xüsusi qeyd olunmalı göstəricidir və "Sabah"ı ölkə futbol tarixində özünəməxsus yerə çıxarır.
Üstəlik, UEFA reytinqində bu mövsüm Azərbaycan klubları arasında ən çox əmsalı da məhz "Sabah" qazandırıb. Bu göstərici də komandanın avrokuboklardakı çıxışının nə qədər dəyərli olduğunu göstərir. Hər qələbə yalnız "Sabah" üçün deyil, bütövlükdə Azərbaycan futbolu üçün əhəmiyyət daşıyır.
İndi isə qarşıda daha bir böyük sınaq var. Azərbaycan çempionunun UEFA Çempionlar Liqasının III təsnifat mərhələsində böyük ehtimalla Polşanın "Lex" klubu ilə qarşılaşacağı gözlənilir. Təbii ki, rəqib daha ciddi və daha çətin olacaq. Amma "Sabah" indiyə qədər göstərdiyi futbol və qazandığı nəticələrlə artıq hər rəqibə hörmətlə yanaşmaqla yanaşı, heç kimdən çəkinmədiyini də nümayiş etdirib.
Bəlkə də "Sabah" yenə tarix yazacaq. Bəlkə də bu möhtəşəm hekayənin qarşısında daha bir səhifə açılacaq. Hər halda, bu komandanın artıq bizi təəccübləndirməyə haqqı çatır. Çünki "Sabah"ın bu gün gəldiyi nöqtə təsadüf deyil. Bu, illərlə görülən işin, qurulan sistemin, doğru addımların və böyük əzmin nəticəsidir.
Bu gün Azərbaycan futbolunda "Sabah" adlı yeni bir Avropa hekayəsi yazılır. Və ən gözəl tərəfi odur ki, bu hekayənin hələ sonunu bilmirik.
"Sabah"a bundan sonrakı mübarizədə də uğurlar! Bəlkə də növbəti tarix yazılacaq səhifə elə çox yaxındadır.
