Lent.az
4 aprelə keçən gecə Səudiyyə Ərəbistanı futbol çempionatının 27-ci turunda "Əl-Nəsr" öz meydanında "Əl-Nəjmə" komandasını böyük hesabla məğlub edib. Qarşılaşmada meydan sahiblərinin kapitanı Kriştiano Ronaldo karyerasının 966-cı və 967-ci qollarını vurub.
Lent.az xəbər verr ki, 41 yaşlı hücumçu əvvəlcə penaltini dəqiq yerinə yetirib, daha sonra isə oyundan qol vurub. Qarşılaşma "Əl-Nəsr"in 5:2 hesablı qələbəsi ilə başa çatıb.
Hazırda portuqaliyalı futbolçunun aktivində ümumilikdə 967 qol var. Onlardan 825-i klub səviyyəsində, 142-si isə Portuqaliya milli komandasında vurulub.
Qeyd edək ki, Ronaldo bu dubla bir aylıq bərpa prosesindən sonra meydanlara qayıtdığı ilk oyunda imza atıb.
Kriştiano Ronaldo Səudiyyə Ərəbistanı çempionatında keçirdiyi 23 oyunda 23 qol vurub və turnirin bombardirlər siyahısında üçüncü pillədə qərarlaşıb. "Əl-Nəsr" isə cari mövsümün turnir cədvəlinə 70 xalla liderlik edir. Bundan əlavə, komanda 17 yanvardan etibarən yerli çempionatda 13 oyundan ibarət qalibiyyət seriyası ilə çıxış edir.
Kriştiano Ronaldo cəmi bir həftə əvvəl zədəsini tam sağaldaraq yenidən Səudiyyə Ərəbistanı çempionatının oyunlarına hazırlaşmağa başlayıb. O, müalicəsini İspaniyada keçib və bu səbəbdən milli komandasının son toplanışlarını buraxmalı olub.
