Idman.biz
İspaniya La Liqasının 27-ci turu çərçivəsində keçirilən "Valensiya" - "Alaves" qarşılaşması inanılmaz ssenari ilə yadda qalıb. "Mestalya" stadionunda baş tutan oyun meydan sahiblərinin 3:2 hesablı dramatik qələbəsi ilə başa çatıb.
İdman.Biz xəbər verir ki, matça sürətli başlayan qonaqlar artıq üçüncü dəqiqədə Lukas Boyenin qolu ilə hesabı açıblar. İkinci hissənin əvvəlində (47-ci dəqiqə) Xavi Qerra tarazlığı bərpa etsə də, 72-ci dəqiqədə Lukas Boye dubl edərək "Alaves"i yenidən önə keçirib.
Lakin "Valensiya" təslim olmayıb. Matçın əsas vaxtının son dəqiqəsində (90-cı dəqiqə) Eray Cömert hesabı bərabərləşdirib. Qarşılaşmanın son saniyələrində, 90+9-cu dəqiqədə isə Uqo Duro penalti zərbəsini dəqiq yerinə yetirərək "Valensiya"ya möhtəşəm qələbə qazandırıb.
Bu nəticədən sonra xallarını 32-yə çatdıran "Valensiya" turnir cədvəlində 12-ci pillədə qərarlaşıb. 27 xalı olan "Alaves" isə 16-cı sıradadır.
00:41
İspaniya La Liqasının 27-ci turu çərçivəsində keçirilən qarşılaşmada "Sevilya" öz meydanında "Rayo Valyekano"nu qəbul edib. "Ramon Sançes Pisxuan" stadionunda baş tutan gərgin mübarizə 1:1 hesablı heç-heçə ilə başa çatıb.
İdman.Biz xəbər verir ki, matçda hesabı meydan sahibləri açıblar. "Sevilya"nın hücumçusu Akor Adams rəqib qapısına yol taparaq komandasını önə keçirib. Lakin qonaqlar məğlubiyyətlə barışmayıblar. "Rayo Valyekano"nun müdafiəçisi Paça (Alfonso Espino) vurduğu cavab qolu ilə tarazlığı bərpa edib.
Bu nəticədən sonra hər iki komanda xallarının sayını 31-ə çatdırıb. Hazırda turnir cədvəlində "Rayo Valyekano" 12-ci, "Sevilya" isə 13-cü pillədə qərarlaşıb. Əndəlus təmsilçisi doğma azarkeşləri önündə vacib üç xalı qazana bilməsə də, rəqibi ilə arasındakı xal fərqinin artmasına imkan verməyib.
21:33
İspaniya La Liqasının 27-ci turu çərçivəsində "Xetafe" öz meydanında turnir cədvəlinin yuxarı pillələrində qərarlaşan "Betis"i qəbul edib. qarşılaşma meydan sahiblərinin inamlı qələbəsi ilə başa çatıb - 2:0.
İdman.Biz xəbər verir ki, matçda hesabı 28-ci dəqiqədə "Xetafe"nin müdafiəçisi Kiko Femenia açıb. İlk hissəyə əlavə olunmuş vaxtda isə hücumçu Martin Satriano fərqi ikiyə çatdıraraq oyunun yekun nəticəsini müəyyənləşdirib.
Bu məğlubiyyətə rəğmən, "Betis" 43 xalla turnir cədvəlinin 5-ci pilləsindəki mövqeyini qoruyub saxlayıb. "Xetafe" isə bu qələbə sayəsində xallarının sayını 35-ə çatdıraraq doqquzuncu sıraya yüksəlib.
Qeyd edək ki, növbəti turda "Betis" martın 15-də doğma divarlar arasında "Selta"nı sınağa çəkəcək. "Xetafe" isə bir gün əvvəl səfərdə Madrid "Atletiko"sunun qonağı olacaq.
20:01
İspaniya La Liqasının 27-ci turu çərçivəsində keçirilən matçda "Vilyarreal" doğma azarkeşləri önündə "Elçe"ni qəbul edib. Gərgin keçən qarşılaşma meydan sahiblərinin 2:1 hesablı qələbəsi ilə başa çatıb.
İdman.Biz xəbər verir ki, "Vilyarreal"ın heyətində Teyon Bukenen və Santyaqo Mourinyo vurduqları qollarla komandalarına vacib qələbəni qazandırıblar. Qonaqların yeganə qoluna isə Andre Silva imza atıb.
Bu nəticədən sonra xallarının sayını 54-ə çatdıran "Vilyarreal" turnir cədvəlinin dördüncü pilləsindəki mövqeyini bir qədər də möhkəmləndirib. "Elçe" üçün isə işlər yaxşı getmir. İspaniya çempionatında qələbə həsrətini 10 matça (altı məğlubiyyət, dörd heç-heçə) çatdıran komanda 26 xalla 17-ci sırada qərarlaşıb.
