Kaşkilya: "Qələbə qazana bilmirik, problemlər var"

Misli Premyer Liqasının XXIII turunun "Şamaxı" – "İmişli" oyunundan (0:0) sonra qonaq komandanın baş məşqçisi Jorj Kaşkilya jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bölüşdü…

– Çox mübarizəli oyun getdi. "Şamaxı"nın oyununu bilirdik, buna hazır idik. Sərt oyun keçdi. Son yarımsaat da daha çox hücum etdik. Şanslarımız var idi, dəyərləndirə bilmədik. "Şamaxı" çox qayda pozuntusu edirdi. Baş hakim də buna imkan verirdi. Sərt oyun tempi aşağı salırdı. Tempi artırmaq istəyirdik. Oyundan razıyıq. Hücuma çıxırdıq. Sonlarda imkanımız oldu, vura bilmədik. Reallıq odur ki, yenə heç-heçə etdik. Pis nəticə deyil. Amma bura qələbə üçün gəlmişdik.

– Komanda uzun müddətdir, qələbə qazanmır. Beş oyundur, qol vura bilmirsiniz. Bunların fonunda nədən razı qalırsınız?

– Heyətimiz limitlidir. Nəzərə almaq lazımdır. Başqa komandalardan fərqli olaraq, bizim hücum oyunçularımızda bəzi keyfiyyətlər çatışmır. Debüt ilimizdir. 22 xal toplamışıq və yaxşı nəticədir. Limitli komanda olsaq da, yaxşı oyun göstəririk. Komandamız hər zaman yüz faiz gücüylə mübarizə aparır. Çempionatdakı mövqeyimizə baxsaq, pis deyil. Sona qədər mübarizə aparırıq. Komandanın əziyyətinə dəyər verilir. Faktdır ki, qələbə qazana bilmirik, problemlər var. Başqa da fakt var ki, Premyer Liqada hər komanda bizə qalib gəlməyə çətinlik çəkir. İşimizə davam edəcəyik. Məqsəd Premyer Liqada qalmaqdır.

– 11-ci sıra ilə aradakı xal fərqi 6-dır. Qarşıdan ağır oyunlarınız gəlir. Fərqin qapanmasından narahat deyilsiniz?

– Narahat edir. İşimizin də məqsədi odur ki, fərqin qapanmasına imkan verməyək. Başa düşürük, çətin oyunlar var. Amma onlara qarşı layiqli mübarizə göstərə bilirik.