Idman.biz
İngiltərə Kubokunda (FA Cup) 1/8 final mərhələsinin növbəti oyunları sensasiyalarla yadda qalıb. "Sauthempton"un "Fulhem"i, "Port Veyl"in isə "Sanderlend"i turnirdən kənarlaşdırmasından sonra diqqətlər "Elland Roud" stadionuna yönəlmişdi. Lakin Premyer Liqa təmsilçisi "Lids" rəqibinə heç bir şans verməyərək sürprizə imkan verməyib.
İdman.Biz xəbər verir ki, Daniel Farkenın keçmiş komandası "Norviç"ə qarşı keçirdiyi oyun "ağlar"ın tam üstünlüyü ilə başa çatıb - 3:0.
Meydan sahibləri ilk hissədəcə vurduqları iki qolla oyunun taleyini demək olar ki, həll ediblər. 32-ci dəqiqədə Şon Lonqstaff hesabı açıb. 43-cü dəqiqədə Qabriel Qudmundsson fərqi ikiyə çatdırıb. Oyunun son dəqiqələrində isə Joel Piroe (85) yekun hesabı rəsmiləşdirib.
Bu qələbə ilə "Lids" 2003-cü ildən bəri ilk dəfə İngiltərə kubokunun 1/4 final mərhələsinə vəsiqə qazanıb. Uzun 23 illik fasilədən sonra gələn bu uğur azarkeşlər tərəfindən böyük sevinclə qarşılanıb.
İngiltərə kubokunda 1/4 final mərhələsinin püşkatması martın 9-da, beşinci mərhələnin sonuncu oyunu olan "Vest Hem" - "Brentford" matçından əvvəl keçiriləcək.
20:17
İngiltərə kubokunun (FA Cup) 1/8 final mərhələsində böyük sensasiya qeydə alınıb. Premyer Liqa təmsilçisi "Sanderlend" ölkənin üçüncü divizionunda (Liqa 1) mübarizə aparan "Port Veyl" klubu ilə qarşılaşıb.
İdman.Biz xəbər verir ki, Stok-on-Trent şəhərində keçirilən matç meydan sahiblərinin 1:0 hesablı qələbəsi ilə başa çatıb. Qarşılaşmada yeganə qolu 28-ci dəqiqədə Ben Ueyn vurub.
Bu nəticəni sensasiyalı edən məqamlardan biri odur ki, matç baş tutan vaxt "Sanderlend" Premyer Liqada 11-ci pillədə qərarlaşdığı halda, "Port Veyl" üçüncü divizionun sonuncusu (24-cü yer) idi. Beləliklə, aşağı liqa təmsilçisi elitada yer alan rəqibini turnirdən kənarlaşdırmağı bacarıb.
"Port Veyl"in 1/4 final mərhələsindəki rəqibi martın 9-da keçiriləcək püşkatma mərasimindən sonra bəlli olacaq.
18:17
İngiltərə kubokunda 1/4 finala vəsiqə uğrunda mübarizə aparan "Fulhem" öz meydanında Çempionşip təmsilçisi "Sauthempton"u qəbul edib. "Kreyven Kottec" stadionunda keçirilən qarşılaşma qonaqların 1:0 hesablı qələbəsi ilə başa çatıb.
İdman.Biz xəbər verir ki, matçın gedişində meydan sahibləri qəribə bir qol epizodu ilə yadda qalıblar. "Sauthempton"un qapıçısı Daniel Peretsin vurduğu top öz müdafiəçisinin başına dəyərək Rodriqo Munisə tərəf yönəlib. Munis topu tora göndərsə də, baş hakim Cared Jillet ondan əvvəl fiti səsləndirdiyi üçün qol qeydə alınmayıb.
Bu qərar "Fulhem" üçün çox baha başa gəlib. Matçın 89-cu dəqiqəsində İoahim Andersen cərimə meydançasında Finn Azazı yıxdığı üçün hakim penalti nöqtəsini göstərib. 91-ci dəqiqədə Ross Stüart zərbəni dəqiq yerinə yetirərək komandasını qələbəyə daşıyıb.
Beləliklə, Premyer Liqa təmsilçisi olan "Fulhem" turnirdəki çıxışını dayandırıb, "Sauthempton" isə adını 1/4 finala yazdırıb.
