Idman.biz
Almaniya Bundesliqasının 25-ci turunun bağlanış matçında "Verder" səfərdə "Union Berlin"in qonağı olub. "An der Alten Försterei" stadionunda keçirilən qarşılaşma qonaqların 4:1 hesablı inamlı qələbəsi ilə başa çatıb.
İdman.Biz xəbər verir ki, matçın taleyinə erkən qırmızı vərəqə və bremenlilərin say üstünlüyündən məharətlə istifadə etməsi birbaşa təsir göstərib.
Görüş meydan sahibləri üçün uğurlu başlayıb. 18-ci dəqiqədə "Verder"in sabiq oyunçusu Derrik Köhn penalti zərbəsini dəqiq yerinə yetirərək paytaxt təmsilçisini önə keçirib. Lakin cəmi bir dəqiqə sonra "Union"un yarımmüdafiəçisi Andraş Şefer rəqibinə qarşı kobud oyununa görə birbaşa qırmızı vərəqə ilə meydandan kənarlaşdırılıb.
Say üstünlüyünü ələ keçirən qonaqlar fasiləyə qədər vəziyyəti tamamilə öz xeyirlərinə dəyişiblər. 31-ci dəqiqədə Olivye Deman künc zərbəsindən sonra yaranan vəziyyətdə hesabı bərabərləşdirib. Cəmi dörd dəqiqə sonra isə Yens Staye başla vurduğu qolla komandasını hesabda irəli çıxarıb.
İkinci hissədə də üstünlüyünü qoruyan "Verder" 66-cı dəqiqədə Mark Qrüllün qolu ilə fərqi artırıb. Matçın son saniyələrində (90+4) isə 18 yaşlı Patris Çoviç Bundesliqada ilk qolunu vuraraq darmadağını rəsmiləşdirib.
Bu qalibiyyət sayəsində xallarını 25-ə çatdıran Daniel Tiunun yetirmələri turnir cədvəlinin 16-cı pilləsindən (releqasiya zonası) uzaqlaşaraq 13-cü sıraya yüksəliblər. "Union Berlin" isə 28 xalla 10-cu yerdə qalıb.
Teqlər: Verder Bremen, Union Berlin, Bundesliqa, Andraş Şefer, Patris Çoviç, Almaniya futbolu
20:54
Almaniya Bundesliqasının 25-ci turu çərçivəsində "Sankt-Pauli" öz meydanında "Ayntraxt"ı qəbul edib. Hamburqun "Millerntor" stadionunda baş tutan görüşdə qapılara qol vurulmayıb.
İdman.Biz xəbər verir ki, gərgin mübarizə şəraitində keçən oyunda hər iki komanda qol vəziyyətləri yaratsa da, hesabı açmaq mümkün olmayıb - 0:0.
Bu nəticədən sonra xallarını 24-ə çatdıran meydan sahibləri turnir cədvəlinin 15-ci pilləsində qərarlaşıblar. 35 xalı olan Frankfurt təmsilçisi isə yeddinci yerdədir.
