Idman.biz
"Formula-1" komandalarının rəhbərləri mövsüm üçün ənənəvi ilk 10 sürücü reytinqini tərtib ediblər.
İdman.Biz-in məlumatına görə, ardıcıl beşinci ildir ki, siyahıda birinci yeri "Red Bull"dan Maks Ferstappen tutub.
Səsvermə anonim şəkildə aparılıb və xallar mövcud çempionat sisteminə uyğun olaraq verilib (birinci yer üçün 25 xal və s.). Son doqquz Qran-pri yarışından altısında qalib gələn Ferstappen ən yüksək reytinqi alıb. Dünya çempionu Lando Norris (McLaren) ikinci, komanda yoldaşı Oskar Piastri isə üçüncü yeri tutublar.
"Mercedes"dən Corc Rassel ötən ilə müqayisədə iki pillə irəliləyərək dördüncü yeri tutub. Fernando Alonso (Aston Martin) isə Karlos Saynsı qabaqlayaraq beşinci yeri tutub.
Səsvermədə aşağıdakı şəxslər iştirak edib: Andrea Stella (McLaren), Toto Volff (Mercedes), Ceyms Voulz (Williams), Alan Permane (Racing Bulls), "Aston Martin" rəhbərliyi, Ayao Komatsu (Haas), Conatan Uitli (Kick-Sauber) və Stiv Nilsen (Alpine). Qeyd etmək lazımdır ki, "Red Bull" və "Ferrari" nümayəndələri siyahıda yoxdur.
