Sport24.az
Azərbaycan Triatlon Federasiyasında yeni baş məşqçinin təqdimatı və son iki ilin fəaliyyətinə dair hesabat tədbiri keçirilib. Sport24.az xəbər verir ki, toplantıda Federasiyanın İdarə Heyətinin üzvləri və məşqçilər iştirak ediblər.
Tədbir Federasiya Prezidenti Fərid Fərhadzadənin çıxışı ilə açılıb. O, çıxışında Prezident İlham Əliyevin idmana göstərdiyi diqqət və qayğını xüsusi vurğulayıb. Bildirilib ki, regionlarda yaradılan müasir idman infrastrukturu və dövlətin idmana dəstəyi triatlonun inkişafı üçün mühüm imkanlar açır. Fərid Fərhadzadə həmçinin Gənclər və İdman naziri Fərid Qayıbovun triatlona verdiyi dəstəyə görə təşəkkürünü bildirib.
Tədbirin əsas hissəsində Triatlon üzrə Azərbaycan Milli Komandasının yeni baş məşqçisi təqdim olunub. Yeni baş məşqçi Oleksandr Mordasov hazırlıq prosesi, kadr potensialının gücləndirilməsi və beynəlxalq arenada nəticələrin artırılması ilə bağlı planlarını iştirakçılarla bölüşüb.
Daha sonra Federasiyanın Baş Katibi Seymur Hüseyinov son iki ilin fəaliyyətini əhatə edən hesabat təqdim edib. Hesabatda yerli və beynəlxalq yarışlar, idmançıların nailiyyətləri və federasiyanın gələcək planları yer alıb.
Sonda vitse-prezidentlər və İcraiyyə Komitəsinin üzvləri çıxış edərək, gələcək hədəflər və triatlonun inkişafı ilə bağlı öz tövsiyələrini paylaşıblar.
Tədbir fikir mübadiləsi və birgə əməkdaşlıq çağırışları ilə yekunlaşıb. Federasiya qarşıdakı dövrdə də triatlonun inkişafı və beynəlxalq uğurların artırılması istiqamətində fəaliyyətini davam etdirəcək.
