Idman.biz
World Athletics təşkilatda müqavilə əsasında məsləhətçi işləyən iki əməkdaş tərəfindən sistematik şəkildə mənimsənilməsini aşkar edib.
İdman.Biz bu barədə təşkilatın mətbuat xidmətinə istinadən məlumat verir.
Bir neçə il ərzində ümumi məbləği 1,5 milyon avrodan bir qədər çox olan oğurluq, World Athletics-in maliyyə şöbəsi tərəfindən yeni maliyyə qrupunun rəhbərlik etdiyi ilk illik audit zamanı aşkar edilib.
Oğurluq aşkarlanmadan əvvəl bir işçi təşkilatı tərk etsə də, digər işçinin və məsləhətçinin müqavilələri daxili araşdırmadan sonra ləğv edilib. Ətraflı iş materialları hazırlanaraq cinayət işi üzrə istintaq üçün müvafiq məhkəmə və hüquq-mühafizə orqanlarına təqdim edilib.
"Təəssüf ki, korporativ oğurluq dünyanın hər yerindəki təşkilatlarda və müxtəlif səviyyələrdəki bütün sahələrdə baş verir. Ən vacibi onu müəyyən etmək, necə baş verdiyini təhlil etmək və sonra yeni prosesləri tətbiq etmək və bunun bir daha baş verməsinin qarşısını almaq üçün nəzarəti gücləndirməkdir. Biz də məhz bunu etdik.
Həmçinin, qanunun bütün gücündən istifadə edərək bütün mümkün vəsaitləri geri qaytarmağa sadiqik. Çox sayda təşkilat bu cür hadisələri ört-basdır edir, məhdud məlumatlarla işçiləri işdən çıxarır, fırıldaqçıların saxtakarlıq fəaliyyətlərini və yeni təşkilatlarda oğurluqlarını davam etdirməsinə imkan verir. Biz bu cür təşkilat deyilik", - deyə World Athletics-in baş direktoru Sebastyan Kou bildirib.
