Azərbaycan paralimpiyaçısı Polad Rzayev Fransanın Auron şəhərində keçirilən paradağ xizəyi üzrə beynəlxalq turnirdə finala yüksəlib.
Oxu.Az xəbər verir ki, bu barədə Milli Paralimpiya Komitəsindən məlumat verilib.
Bildirilib ki, LW3 kateqoriyası üzrə mübarizə aparan idmançı ilkin mərhələni 1:01.57 nəticə ilə başa vuraraq, həlledici raunda vəsiqə qazanıb.
Qeyd edək ki, P.Rzayev ötən həftə İtaliyanın Pila şəhərində keçirilmiş analoji turnirin də finalında çıxış edib. Yarış 2026-cı ildə keçiriləcək Qış Paralimpiya Oyunlarına reytinq xalları qazandırır.
Xatırladaq ki, Xüsusi Təyinatlı Qüvvələrin ehtiyatda olan zabiti Polad Rzayev Vətən müharibəsinin iştirakçısıdır. O, "Azərbaycan bayrağı", "Şücaətə görə" ordenlərinə, "Xocavəndin azad olunmasına görə", "Qubadlının azad olunmasına görə", "Cəbrayılın azad olunmasına görə" medallarına layiq görülüb.