Report.az
Paralimpiyaçı kimi yeni hədəflərimə nail olmağa çalışacağam.
"Report"un məlumatına görə, bunu Vətən müharibəsi iştirakçısı Polad Rzayev Milli Paralimpiya Komitəsinin (MPK) mətbuat xidmətinə açıqlamasında deyib.
O, daha əvvəl idmanla həvəskar şəkildə məşğul olduğunu bildirib:
"Dağçılıq, üzgüçülük, kinkboksinq, dağ xizəyi ilə məşğul olmuşam. İdmana gəlişim Milli Paralimpiya Komitəsinin təşəbbüsü ilə gerçələşdi. Həvəskar şəkildə xizək sürürdüm və videolarımı paylaşırdım. Mənə təklif etdilər. Fikirləşdim ki, niyə də olmasın? İlk hədəfim çempion olmaq, Azərbaycana qış idman növlərində ilk qızıl medal gətirməkdir. Ən böyük hədəfim isə fiziki əngəlli gənclərə təkan verməkdir. Həvəskar xizəkdən peşəkara keçdim. Məşqlərimiz sistemli və intizamlı şəkildə davam edir".
Qeyd edək ki, Xüsusi Təyinatlı Qüvvələrin ehtiyatda olan zabiti Polad Rzayev Vətən müharibəsinin iştirakçısıdır. O, "Azərbaycan bayrağı", "Şücaətə görə" ordenlərinə, "Xocavəndin azad olunmasına görə", "Qubadlının azad olunmasına görə", "Cəbrayılın azad olunmasına görə" medallarına layiq görülüb. O, paralimpiyanın dağ xizəyi növündə mübarizə aparacaq.
