İdman.biz
Bakıda keçirilən atıcılıq üzrə Dünya kuboku davam edir.
İdman.biz xəbər verir ki, bu gün daha bir dəst medal sahibini tapacaq.
Qadınlar 25 m məsafədən tapança ilə atəş açmada mükafatçıları müəyyənləşdirəcək. Azərbaycan atıcıları dünənki təsnifat mərhələsində mübarizəni dayandırıblar. Xanna Əliyeva 574 xalla 36-cı olub. Zeynəb Sultanova 52-ci (571 xal), Həqiqət Atayeva 54-cü (569 xal), Nigar Nəsirova 60-cı (565 xal), Leyli Əliyeva 66-cı (549 xal) yeri tutub.
Kişilər isə bu növdə təsnifat mərhələsini bu gün başa vuracaq. Azərbaycan yığmasının atıcıları ilk gündən sonra liderlərdən uzaqdır. Ruslan Lunyov 289 xalla 20-ci, İlham Qarayev 275 xalla 50-ci, Cəfər Sultanlı 272 xalla 54-cüdür.
Bu gün qadınların tüfənglə 50 m məsafədən üç vəziyyətdə atəş açma yarışlarında təsnifat mərhələsi baş tutacaq. Azərbaycan bu növdə təmsil olunmayacaq.
Qeyd edək ki, mayın 1-də start götürən Dünya kubokuna ayın 12-də yekun vurulacaq.
İdman.biz
