Idman.biz
İspaniyanın "Andorra" klubunun qapıçısı Xesus Ovono "Tenerife"nin futbolçusu Xesus de Migellə toqquşduğu epizoda görə ağır cəzalandırılıb. Həmin hadisədən sonra 30 yaşlı hücumçu həyatını itirmişdi.
İdman.Biz xəbər verir ki, İspaniya Kral Futbol Federasiyasının İntizam Komitəsi 25 yaşlı qapıçını 12 oyunluq diskvalifikasiya edib.
Qərar federasiyanın İntizam Məcəlləsinin 102-ci maddəsinə əsasən qəbul olunub. Bu maddə oyun zamanı rəqibə qarşı zorakı hərəkət nəticəsində ağır xəsarət yetirilməsinə görə dörd oyundan 12 oyunadək cəza nəzərdə tutur. Ovonoya maksimum sanksiya tətbiq edilib.
Hadisə noyabrın ikisində İspaniya ikinci liqasının 12-ci turunda keçirilən "Tenerife" - "Andorra" qarşılaşmasının son dəqiqələrində baş verib. Ovono topla mübarizə zamanı De Migellə sərt toqquşub və birbaşa qırmızı vərəqə alıb.
Meydanda huşunu itirən hücumçu xəstəxanaya çatdırılsa da, ertəsi gün vəfat edib. Hadisənin ağırlığı səbəbindən qarşılaşma 2:2 hesabı ilə davam edərkən dayandırılıb.
Qeyd edək ki, "Andorra"nın baş məşqçisi Karles Manso daha əvvəl Ovononun futbola qayıtmaqla bağlı qərarı özünün verəcəyini açıqlamışdı. Klub faciədən sonra qapıçıya psixoloji dəstək göstərir.
