Idman.biz
UEFA Millətlər Liqasında beşinci turun oyunları keçirilib. Niderland millisi Yunanıstanı yeddi cavabsız qolla darmadağın edib, Almaniya Serbiya səfərindən qələbə ilə dönüb, İslandiya isə Bolqarıstanın qapısından beş top keçirib.
İdman.Biz xəbər verir ki, A Liqasının ikinci qrupunda Niderland Amsterdamdakı "Yohan Kroyff Arena"da Yunanıstanı 7:0 hesabı ilə məğlub edib.
Hesab altıncı dəqiqədə Krisensio Summervill tərəfindən açılıb. Ardınca Teyani Reynders 12, 18 və 33-cü dəqiqələrdə fərqlənərək het-trik edib. Yurriyen Timber 40 və 59-cu dəqiqələrdə iki qol vurub. Son nöqtəni isə 62-ci dəqiqədə Doniell Malen qoyub.
Bu nəticədən sonra Niderland millisi xalını 11-ə çatdıraraq qrup liderliyini möhkəmləndirib. Yunanıstan isə səkkiz xalla ikinci pillədə qərarlaşıb.
Qrupun digər oyununda Almaniya millisi Belqradda Serbiyanı 3:1 hesabı ilə məğlub edib.
"Rayko Mitiç" stadionunda keçirilən qarşılaşmada hesab üçüncü dəqiqədə açılıb. Serbiyalı müdafiəçi Srdjan Babiç avtoqolla yadda qalıb. Florian Virts 14-cü dəqiqədə qonaqların üstünlüyünü artırıb.
İkinci hissənin əvvəlində Brayan Qruda 50-ci dəqiqədə hesabı 3:0-a çatdırıb. Altı dəqiqə sonra Babiç bu dəfə rəqib qapısına yol taparaq fərqi azaldıb.
Serbiya millisi qarşılaşmanı doqquz nəfərlə başa vurub. Meydan sahiblərindən Vanya Draqoyeviç 77-ci, Andriya Jivkoviç isə 89-cu dəqiqədə qırmızı vərəqə alıb.
Beşinci turdan sonra Almaniya səkkiz xalla üçüncü pillədədir. Serbiya isə hələ xal qazana bilməyib və qrupun sonuncusudur.
B Liqasının birinci qrupunda Şotlandiya Qlazqodakı "Hempden Park" stadionunda Şimali Makedoniyaya 2:1 hesabı ilə qalib gəlib.
Qarşılaşmada hesab 54-cü dəqiqədə Con Makginn tərəfindən açılıb. Üç dəqiqə sonra Elmin Rastoder tarazlığı bərpa etsə də, 74-cü dəqiqədə Makginn penaltini dəqiq yerinə yetirərək dublunu rəsmiləşdirib və komandasına qələbə qazandırıb.
Eyni qrupun digər oyununda Sloveniya və İsveçrə milliləri qolsuz heç-heçəyə razılaşıblar - 0:0.
C Liqasının üçüncü qrupunda Moldova Qazaxıstanı 2:1 hesabı ilə məğlub edib. Slovakiya isə Farer adaları ilə qarşılaşmada iki dəfə fərqlənsə də, qələbə qazana bilməyib - 2:2.
Dördüncü qrupda İslandiya səfərdə Bolqarıstanı 5:0 hesabı ilə darmadağın edib. Estoniya da səfərdə uğur qazanaraq Lüksemburqu minimal hesabla üstələyib - 1:0.
D Liqasının birinci qrupunda Andorra millisi Cəbəllütariqi 2:0 hesabı ilə məğlub edib.
09:37
Bu gün UEFA Millətlər Liqasında qrup mərhələsinin beşinci turunun oyunları keçiriləcək. Əsas qarşılaşmalar A Liqasında baş tutacaq. Belə ki, Niderland Yunanıstanı, Almaniya isə səfərdə Serbiyanı qəbul edəcək.
İdman.Biz xəbər verir ki, Niderland və Yunanıstan hərəyə səkkiz xal toplamaqla A Liqasının ikinci qrupunda ilk iki pilləni bölüşürlər. Komandalar ilk dövrədə 2:2 hesablı heç-heçə ediblər. Bu dəfə qələbə Yunanıstan millisinə qrup qalibi adını vaxtından əvvəl təmin etmək imkanı verəcək.
Liderlərdən üç xal geri qalan Almaniya isə Serbiya ilə qarşılaşmada pley-off mərhələsinə yüksəlmək şansını qorumağa çalışacaq. Serbiya yığması indiyədək keçirdiyi dörd oyunun hamısında məğlub olub.
B Liqasında İsveçrə Sloveniyaya səfər edəcək. B1 qrupunun lideri əvvəlki bütün görüşlərdə qələbə qazanıb. Komandaya elit diviziona vaxtından əvvəl qayıtmaq üçün heç-heçə də kifayət edəcək. Şotlandiya isə Şimali Makedoniyanı qəbul edəcək. Meydan sahibləri bu görüşdə qələbə qazanaraq Sloveniya ilə aradakı fərqi azaltmağa çalışacaqlar.
C Liqasında Slovakiya Farer adalarını məğlub etməklə deyil, heç-heçə ilə də yüksək liqaya yüksəlməyi vaxtından əvvəl təmin edə bilər. Moldova və Qazaxıstan ikinci pillə uğrunda mübarizədə vacib oyuna çıxacaqlar. İslandiya Bolqarıstanla qarşılaşmada liderliyini möhkəmləndirməyə çalışacaq. Qrupun digər iddialı komandası Estoniya isə Lüksemburqun qonağı olacaq.
D Liqasında Andorra və Cəbəllütariq turnirdə ilk qələbələrini qazanmağa çalışacaqlar. Azərbaycan millisi isə səfərdə Lixtenşteynlə üz-üzə gələcək. Yığmamız qələbə qazanacağı təqdirdə qrup birinciliyini vaxtından əvvəl təmin edəcək.
Günün oyunlarının təqvimi (Bakı vaxtı ilə):
A Liqası
23:45. Niderland – Yunanıstan
23:45. Serbiya – Almaniya
B Liqası
23:45. Şotlandiya – Şimali Makedoniya
23:45. Sloveniya – İsveçrə
C Liqası
21:00. Moldova – Qazaxıstan
23:45. Slovakiya – Farer adaları
23:45. Bolqarıstan – İslandiya
23:45. Lüksemburq – Estoniya
D Liqası
23:45. Andorra – Cəbəllütariq
23:45. Lixtenşteyn – Azərbaycan
