Polşada fəaliyyət göstərən skautinq mütəxəssisi Euqonio Qonzalez Aguilera Azərbaycan millisinin futbolçusu Toral Bayramovun "Rakuv"a mümkün transferi ilə bağlı fikirlərini bölüşüb. Sport24.az xəbər verir ki, "Escola Pro" skaut şirkətinin rəhbəri bu barədə sosial şəbəkə hesabında yazıb.
Mütəxəssis hazırda "Bursaspor"da çıxış edən 24 yaşlı futbolçunun Polşa klubuna keçidinin real görünmədiyini bildirib. O, "Rakuv"un Toralın transferi üçün tələb olunan məbləği ödəməkdə çətinlik çəkə biləcəyini vurğulayıb:
"Türkiyə klubu yayda onun üçün 1 milyon avro ödəyib. Hazırda komandanın əsas heyətində yer almayan futbolçu üçün "Rakuv"un bu məbləği qarşılaması inandırıcı görünmür. Polşa klubu ilin sonunda müqaviləsi başa çatacaq Erik Otieno ilə razılığa gələ bilmir. Buna görə də komandaya sol cinah müdafiəçisi lazımdır".
Qeyd edək ki, Toral Bayramov may ayında "Bursaspor"a keçib və Türkiyə klubu ilə 3 illik müqavilə imzalayıb.