"Arsenal"ın keçmiş futbolçusu Piter Stori 81 yaşında vəfat edib. Sport24.az xəbər verir ki, bu barədə klubun rəsmi saytı məlumat yayıb.
Stori müdafiəyə meyilli yarımmüdafiəçi və cinah müdafiəçisi mövqelərində çıxış edib. O, 1962-1977-ci illər ərzində "Arsenal"da oynayıb, həmçinin digər London klubu "Fulhem"in də şərəfini qoruyub. O, İngiltərə milli komandasının heyətində 19 oyun keçirib.
1970/71 mövsümündə o, "Arsenal"la həm çempionluq titulunu, həm də İngiltərə Kubokunu qazanıb. Ondan əvvəlki mövsümdə isə o, "Yarmarkalar Kuboku"nu (Inter-Cities Fairs Cup) qazanan heyətin üzvü olub.
Bundan əlavə, Stori İngiltərə millisi ilə üç dəfə "British Home Championship" (Böyük Britaniya Ev Çempionatı) turnirinin qalibi olub.