Idman.biz
"Velosiped idmanının inkişafı üçün işlər görülür. Həvəs olan yerdə bizsiz də proseslər gedir".
İdman.Biz xəbər verir ki, bu sözləri Azərbaycan Velosiped İdmanı Federasiyasının vitse-prezidenti, həm də turnirin Təşkilat Komitəsinin sədri Sahib Ələkbərov "Bakı-Xankəndi" Azərbaycan velosiped yarışı ilə bağlı açıqlama verib.
O bildirib ki, yarışda iştirak edən 24 komandanın hər biri gələcəkdə yenidən Azərbaycana qayıtmaq istəyir:
"Azərbaycanın hər bölgəsində gözəl mənzərələr var. Yarış uğurla keçir. Təhlükəsizlik tam təmin olunub. Bu turnirdə iştirak edən 24 komandanın hər biri gələcəkdə yenidən ölkəmizə gəlmək istəyəcək. Onlar Azərbaycana heyran qalıblar. Medalçıları təbrik edirəm".
S.Ələkbərov həmçinin velosiped idmanının inkişafı istiqamətində görülən işlərdən də danışıb:
"Velosiped idmanının inkişafı üçün işlər görülür. Həvəs olan yerdə bizsiz də proseslər gedir. Elə kəndlər var ki, orada insanlar əsasən velosipeddən istifadə edirlər. Son 7-8 ay ərzində rayonlarda velosiped bölmələri yaradılıb, idmançılar velosipedlə təmin olunub. Uşaqlar bu idman növünə cəlb edilir. Gədəbəy, Qəbələ və Şamaxıda artıq bölmələr fəaliyyət göstərir, Qazaxda da yaradılması nəzərdə tutulur. Maraq kifayət qədər böyükdür".
Qeyd edək ki, veloyürüşün Qəbələ-İsmayıllı üzrə üçüncü mərhələsinin qalibi Qazaxıstanın "XDS Astana" komandasının rusiyalı üzvü Qleb Suritsa olub. Bakı-İsmayıllı üzrə ikinci mərhələsinin qalibi Qazaxıstanın "XDS Astana" Dünya Turu komandasının velosipedçisi Yevgeni Fyodorov olub. Bakı-Sumqayıt üzrə yarışın ilk mərhələsinin qalibi isə Çinin "Li-Ninq Star" komandasının belarusiyalı üzvü Aleksey Şnirko olub.
Xatırladaq ki, Beynəlxalq Velosipedçilər İttifaqının (UCI) 2.1 kateqoriyalı yarışında dünyanın 20 ölkəsini təmsil edən 24 komanda iştirak edir. Beş mərhələdən ibarət turnirin mükafat fondu 50 min avrodan çoxdur. Yarışa mayın 14-də yekun vurulacaq. Turnirin final mərhələsi Xankəndi şəhərində təşkil olunacaq.
Araz Xəlilli
