"Hələ heç nə bitməyib - Rüstəm İmanzadə"

"Hələ heç nə bitməyib - Rüstəm İmanzadə" filminin premyerası keçirilib.

İdman.biz xəbər verir ki, ağırlıqqaldırma üzrə dəfələrlə Azərbaycan çempionu və gənclər arasında Avropa çempionu olan Rüstəm İmanzadəyə həsr edilən idman dramı Gənclər və İdman Nazirliyinin dəstəyi ilə istehsal olunub.

Bakı Gənclər Mərkəzində baş tutan premyerada gənclər və idman naziri Fərid Qayıbov, müavini Mariana Vasilyeva, Azərbaycan Ağırlıqqaldırma Federasiyasının prezidenti Kamran Nəbizadə, Türkiyə Ağırlıqqaldırma Federasiyasının prezidenti Tələt Ünlü, Avropa Ağırlıqqaldırma Federasiyasının sabiq prezidenti Hasan Akkuş, Milli Olimpiya Komitəsinin vitse-prezidenti Çingiz Hüseynzadə, müxtəlif federasiyalarınım nümayəndələri, Olimpiya çempionları və idmançılar iştirak ediblər.

Filmdə İmanzadənin həyatından, karyerasından, idmana olan sevgisindən, 2014-cü ildə Kiprin Limassol şəhərində keçirilən qitə birinciyilində 148 kq çəkini qaldırarkən sağ qolunun qırılmasından və belindən ağır zədələnməsindən bəhs edilir.

15 yaşadək atletlər arasında Avropa çempionu ağır zədə səbəbindən uzun müddətdir əlil arabasında hərəkət etsə də, yenidən idmana qayıdacağı anı gözləyir: "Mənim ailəmdə heç idmançı yoxdur. Yalnız babam güləşçi olub. Gözümə heç nə görünmür. İstəyirəm sağalıb tez idmanıma qayıdım. Bu gün ən yaxın dostum arabamdır. Ayağımı bir az qaldıranda dedim ki, hələ heç nə bitməyib, hər şey qabaqdadır".

Yekunda filmin yaradıcı heyəti təqdim olunub və onların gördükləri iş alqışlarla qarşılanıb.

Filmin layihə-rəhbəri Əli-Səttar Quliyev Rüstəmlə keçən il tanış olduğunu vurğulayıb: "Belə bir həyatı sevən insanı görəndə təəccübləndim. O, 9 ilə yaxındır idmandan ayrılıb. Həyatı mənə çox maraqlı gəldi. Rüstəm həm yaxşı idmançı, həm də çox yaxşı insandır. Şadam ki, həyatda Rüstəm kimi insanla tanış oldum".

Banuçiçək Hüseynli
İdman.biz