Idman.biz
Qəbələdə yerli yorğa atların iştirakı ilə Respublika çempionatı təşkil olunub.
İdmanBiz xəbər verir ki, yarışda Azərbaycanın müxtəlif bölgələrindən olan atçılar və atsevərlər iştirak ediblər.
Çempionat gərgin və həyəcanlı anlarla yadda qalıb. Qaçışların nəticələrinə əsasən, Maştağa (Bakı) təmsilçisi "Dül-Dül" ləqəbli at birinci yerə, Yurd (Gəncə) təmsilçisi "Kəhərxan" ləqəbli at isə ikinci yerə layiq görülüb.
Tədbir yerli atçılıq ənənələrinin qorunması və bu sahəyə marağın artırılması məqsədilə təşkil olunub.
Qeyd edək ki, yorğa atlar qədimdən Azərbaycan atçılıq mədəniyyətinin ayrılmaz hissəsi sayılır. Bu atlar özünəməxsus "yorğa yerişi" - yəni hamar, ritmik və sabit addımlama qabiliyyəti ilə fərqlənir. Yorğa yerişi zamanı atın hərəkəti minici üçün sarsıntısız və rahat olur, bu da onları həm yarış, həm də uzun məsafəli gedişlər üçün ideal edir.
Azərbaycanın müxtəlif bölgələrində - xüsusilə Qəbələ, Şəki, Gəncə və Qarabağda - yorğa atların yetişdirilməsi qədim ənənələrə söykənir. Onlar təkcə idman yarışlarında deyil, həm də folklor tədbirlərində, milli bayramlarda və mərasimlərdə nümayiş etdirilərək xalq mədəniyyətinin canlı nümunəsi kimi qorunur.
