Report.az
Qəbələ-Xankəndi ultramarafonununun sonuncu - dördüncü mərhələsinin qalibləri müəyyənləşib.
"Report"un bölgəyə ezam olunan əməkdaşı xəbər verir ki, Ağdamdan başlayan yarış Xankəndidə sona çatıb.
Ultramarafon iştirakçıları bu mərhələdə 28 kilometr məsafə qət ediblər.
Son mərhələnin qalibi kişilər arasında türkiyəli atlet Ömər Alkanoğlu olub. İkinci yeri onun həmyerlisi Üzeyir Söyləməz, üçüncü pilləni isə gürcüstanlı Georgi Lomidze tutublar.
Əvvəlki üç mərhələni Üzeyir Söyləməz birinci pillədə başa vurduğu üçün əsas mükafat ona verilib.
Qadınların mübarizəsində son mərhələni Türkiyəli Hasibe Deniz birinci, ukraynalı Olena Şevçenko ikinci, Leyla Abdinova isə üçüncü sırada başa vurub.
Burada da ilk üç mərhələdə Olena Şevçenko bütün rəqiblərini qabaqladığı üçün əsas qalib o hesab edilib.
Qeyd edək ki, "İdman Paytaxtı" Qəbələ şəhərindən start götürən ultramarafona 23-ü qadın olmaqla 81 atlet qatılıb. Yarış iştirakçıları arasında Türkiyə, Ukrayna, Rusiya, Moldova və Gürcüstan atletləri yer alıblar.
Ümumilikdə 192 kilometr məsafəni əhatə edən ultramarafonun ilk mərhələsində iştirakçılar Qəbələdən Ağdaşa qədər 55 km məsafəni qaçıblar.
İdmançılar daha sonra Ağdaşdan Bərdəyə (65 km) və Bərdədən Ağdamadək (44 km) məsafəni qət ediblər. Əvvəlki üç mərhələnin qalibləri ayrıca təltif edilib. Ultramarafonun ümumi qalibləri isə baş mükafata layiq görüləcəklər.
