Parisdə Milli Komanda: İlk Təəssüratlar

(I seriya)

Ötən gün milli komandanı Parisə aparan təyyarə 15:00 radələrində buludları yarmağa başladı. Bunadək sərhəddi keçərkən sərhədçinin bəndənizə "bu boyda yol qət etməyə dəyməz" deməsini nə qədər real olsa da, eşitmək xoş olmadı.

Altı saata yaxın yolçuluğun bir qismi baş məşqçi Ayxan Abbasovla qarşıdakı matçın müzakirəsi, ümumi planlar və gözləntilər ətrafında əridi. Uçuşun digər saatlarına (oyunçularla ünsiyyətə icazə verilmirdi) həmkarlarla keçmiş səyahətlər zamanı yaşanan kuryoz əhvalatlarla rəng qatmağa çalışdıq. Daha sonra isə ənənəvi "sizinki sizdə, bizimki bizdə" deyib komandadan ayrıldıq. 

… "Paris - sevməyə və ölməyə" - əbəs yerə deməyiblər. Axşam saatlarında Fransanın paytaxtı bir çox Avropa paytaxtlarından fərqli olaraq "yuxuya getmir". Məskunlaşdığımız hoteldən Eyfel qülləsinədək məsafə 5 km təşkil edir. Ancaq  həmin yolu 1 saatdan çox vaxtımız getsə də, piyada qət etməyi qərara almaqla şəhərin "gecə libası"nı seyr etməyi üstün tutduq. Sena çayının sahili ilə irəlilədikcə, Avropanın əksər tarixi hadisələrində mühüm rol oynamış və eramızdan əvvəl III əsrdə tikilmiş şəhərin gizli nəfəsini hiss etməmək mümkün deyil. Qüllənin üstünlüklərindən biri o oldu ki, yolumuz yarı olmamışdan onu görməyə başladıq və Eyfelin sehri istər-istəməz öz cazibəsi ilə yorulan ayaqlara xüsusi stimul verdi. 

Senanın sahili boyunca təmiz havadan qəbul edəndə yaşıllıqları məhv edib "bakinskiy novostroykaları" tikənləri dəfələrlə yad etdik.  Həmin gecə Eyfelin "ayaqları altı"nda yəqin ki, dünyanın yarısı qədər ölkə təmsilçilərini gördük. Sanki sivilizasiyanın qarışdığı mərkəz nöqtəsidi Eyfel. Əzəməti isə… nə gizlədim, uşaqlıq arzularımda 3 şəhər olub və onlardan ikincisini dünən görmək nəsibim oldu. Eyfel qülləsi sadəcə, başqa dünyadı, əziz oxucu. Görməyənlərə qismət olsun. Bu cür anları yaşamaq insan üçün əbədi iz olur.

Yerli vaxtla gecə saat 1-di (Bakıda saat 3), ancaq heç birimiz inanılmaz cazibə qüvvəsinə sahib Eyfelin ərazisini tərk etmək istəmirik. Bir azdan Ayxan Abbasovun mətbuat konfransına yollanacağıq. Bugünkü Parisi isə mütləq bölüşəcəyəm. İndilik isə səfərdə saytımıza dəstək olan "Misli"yə eksklüziv təşəkkür.

Ardı var...

Ceyhun Əliyev