Report.az
"Glory 99" turnirində rəqibim çox güclü olsa da, ona rahat qalib gəldim.
Bunu "Report"a açıqlamasında Azərbaycan kikboksçusu Bəhram Rəcəbzadə Niderlandın Rotterdam şəhərində baş tutan "Glory 99" turnirində qazandığı qələbə ilə bağlı danışarkən deyib.
O, niderlandlı Brayan Douesin döyüşdən əvvəl iddialı danışdığını söyləyib:
"Rəqibim çox güclü olsa da, ona rahat qalib gəldim. Yarışdan əvvəl iddialı açıqlamalar vermişdi. Şükürlər olsun ki, onu vaxtından əvvəl, ilk raundda məğlub etdim. Döyüşdən öncə rəqibim üzərində ikinci raundda nokautla qələbə qazanacağımı düşünürdüm".
İdmançı iştirak edəcəyi "Glory 100" turniri ilə bağlı da fikirlərini deyib:
"İyunda "Glory 100" turnirində iştirak edəcəyəm. İlk rəqibim albaniyalı idmançıdır. Reqlamentə əsasən, bir gündə iki döyüş keçiriləcək. İlk görüşdə qələbə qazansam, digər cütün qalibi ilə üz-üzə gələcəyəm. Burada da qələbə qazansam, dekabrda daha bir döyüşüm olacaq".
Kikboksçu qələbəsini Azərbaycan xalqına, şəhidlərə və qazilərə həsr etdiyini vurğulayıb:
"Qələbəni Azərbaycan xalqına həsr edirəm. Mənim bu səviyyəyə yüksəlməyimdə Azərbaycan və Türkiyə xalqının rolu böyük olub. Azərbaycan mənim ailəmdir. Şəhidlərimiz və qazilərimiz olmasaydı, indi biz başıuca gəzə, xaricdə ölkəni qürurla təmsil edə bilməzdik. Qələbəmi əsas da onlara həsr edirəm. Həmçinin Azərbaycan Kikboksinq Federasiyasının fəxri prezidenti Adil Əliyevə mənə dəstək göstərdiyi üçün təşəkkür edirəm".
Qeyd edək ki, B.Rəcəbzadə Niderlandda keçirilən "Glory 99" turnirində yerli idmançı Brayan Douesi məğlub edib. O, iyunun 13-14-də "Glory 100" turnirində mübarizə aparacaq. İdmançının ilk rəqibi albaniyalı Asdren Qasi olacaq.
