Report.az
Bizim layihəmiz beşillikdir. Artıq iki ili geridə qalıb. Üç ildən sonra ciddi mübarizə apara biləcək oyunçularımız olacaq.
Bu fikirləri "Report"a açıqlamasında qadın basketbolçulardan ibarət Azərbaycan millisinin baş məşqçisi Evren Alkaya deyib.
Türkiyəli mütəxəssis yığmanın AVRO-2025-in seçmə mərhələsindəki çıxışını dəyərləndirib:
"2022-ci ilin dekabrından bu vaxtadək altı oyun keçirdik. Həqiqətən ən çətin üç rəqiblə eyni qrupa düşdük. Polşa, Belçika və Litva səviyyəsində kollektivlər digər qruplarda azdır. Polşa və Litvada qadın basketbolu çox inkişaf edib. Bu səbəbdən güclü rəqiblərlə üz-üzə gəlməli idik. Bu səviyyədə rəqibləri görmək də bizim üçün sürpriz oldu. Çünki komandamız buna hazır deyildi. Federasiya da qadın basketboluna ciddi dəstək olur. Əlimizdəki oyunçuları müəyyənləşdirmişik. Yeni və gənc oyunçularla heyəti komplekləşdirmək istəyirik. 2007-2010 təvəllüdlü oyunçuları həyətə cəlb etmişik. Buna məcbur idik. Çünki əvvəlki heyətdə yer alan basketbolçuların yaşı 40 və daha yüksək idi".
O, yeni basketbolçuların təcrübə qazanmasını istədiklərini söyləyib:
"Seçmə mərhələdə xal qazanmaq kimi bir hədəfimiz yox idi. İlk görüşlərdə xal fərqi daha böyük olurdu. Vaxt keçdikcə bunu azaltdıq. Bu çətindir. Məsələn, fikirləşin ki, İspaniyanın "Real" klubu ilə Türkiyə təmsilçisi "Bursaspor" oynayır. Amma təslim olmadıq. Qadın basketbolunda təcrübə qazandıq. Bizim layihəmiz beşillikdir. Artıq iki ili geridə qalıb. Üç ildən sonra ciddi mübarizə apara biləcək oyunçularımız olacaq. Məncə, Litva və Belçika Avropa çempionu ola bilərlər. Bu sürpriz olmayacaq. Fransa da namizədlərdən biridir. Komandamızın belə ciddi rəqiblərlə oynaması oyunçularımız üçün şansdır. Buna görə Azərbaycan Basketbol Federasiyasının rəhbərliyinə təşəkkür edirik. Bu oyunçular həftədə 10 dəfə məşq edirlər. Məktəbdən əvvəl və sonra da çalışırlar. Həyatlarını basketbola veriblər. İnanıram ki, yaxşı idmançılarımız olacaq. Çox gəncdirlər. Hazırda onlardan nəticə istəmək tezdir. Amma inanmağa davam edəcəyik".
Qeyd edək ki, Azərbaycan millisi Polşa ilə yanaşı, Belçika və Litva ilə mübarizə apardığı qrupda keçirdiyi bütün görüşlərdə rəqiblərinə məğlub olub.
