Idman.biz
"Hədəfim çempionluq idi, ancaq üçüncü yer qismət oldu".
Bunu İdman.biz-ə Azərbaycan millisinin cüdoçusu Murad Fətiyev deyib.
O, Monteneqronun paytaxtı Podqoritsada keçirilən Avropa çempionatında çıxışını dəyərləndirib. 90 kq çəki dərəcəsində fəxri kürsünün üçüncü pilləsinə yüksələn Fətiyev bildirib ki, yarış çox ağır keçib: "Bəzi qarşılaşmalar xüsusilə çətin keçdi. Məsələn, gürcü Luka Maysuradze bundan əvvəl üç dəfə məni udmuşdu, yalnız bir dəfə mən qələbə qazanmışdım. Onunla qarşılaşma ağır keçsə də, qalib tərəf mən oldum. Həmçinin bürünc uğrunda mübarizə apardığım fransız idmançısı Aleksis Matye ilə daha öncə iki dəfə qarşılaşmışdıq. Bu görüşlərin birində o, birində də mən qələbə qazanmışdım. Çox güclü idmançıdır. Matye ilə budəfəki qarşılaşma da çətin keçdi".
Cüdoçu gələcək planlarından da danışıb: "40 gün sonra dünya çempionatı var. Bakıya qayıdan kimi məşqlərə başlayacağıq. Vaxtımız çox azdır. Dünya çempionatında medal götürməyi çox istəyirəm".
Qeyd edək ki, Avropa çempionatının bürüncü uğrunda mübarizədə Fətiyev Aleksis Matyeyə ipponla qalib gələrək, 3-cü yeri tutub.
Aytac Sahəd
İdman.biz
