Idman.biz
Bu gün Azərbaycan Respublikasının Prezidenti İlham Əliyevin Sərəncamı ilə ölkəmizdə idmanın inkişafında xüsusi xidmətlərinə və yüksək peşəkarlığına görə bir qrup idman xadimi "Əməkdar bədən tərbiyəsi və idman xadimi" fəxri adına layiq görülüb.
Onlardan biri də yaxın keçmişdə tanınmış cüdoçu, Olimpiya Oyunlarının bürünc mükafatçısı, veteranlar arasında dəfələrlə dünya çempionu olmuş, hazırda isə Daxili İşlər Nazirliyinin İdman Cəmiyyətində rəhbər vəzifədə çalışan Mövlud Mirəliyevdir.
İdman.Biz bu münasibətlə polis polkovniki Mövlud Mirəliyevdən açıqlama alıb.
"Düzünü desəm, bu mənim üçün çox xoş bir sürpriz oldu. Çox sevindiyimi demək, demək olar ki, heç nə deməməkdir. Bu ad mənim üçün hətta bu ilin noyabrında veteranlar arasında keçirilən turnirdə qazandığım dünya çempionluğu titulundan da yüksəkdir. Dövlətimizin başçısının mənim idman sahəsindəki xidmətlərimə bu cür yüksək qiymət verməsindən böyük məmnunluq hissi keçirirəm", - deyə Mövlud Mirəliyev bildirib.
