Idman.biz
Kosei İnouenin adı dünya üzrə cüdo sevərlərə yaxşı tanışdır. Sidney Olimpiadasının çempionu, ikiqat dünya çempionu olan idmançının karyerası uğurla inzibati istiqamətdə davam edib. O, Yaponiya Cüdo Federasiyasının (AJJF) İcraiyyə Komitəsinin və ölkəsinin Milli Olimpiya Komitəsinin üzvü, eyni zamanda Beynəlxalq Cüdo Federasiyasının (IJF) idman direktorudur. Dünya cüdosunun əfsanəsi İdman.Biz-ə verdiyi müsahibədə mövsümün yekunlarını dəyərləndirib, Bakıda keçiriləcək dünya çempionatından gözləntilərini bölüşüb və bir çox digər məsələlərdən danışıb.
– Tokida keçirilən Böyük Dəbilqə turniri ənənəvi olaraq mövsümü yekunlaşdırdı və meydan sahibləri 37 medal qazandı, onlardan 11-i qızıl oldu. Demək olarmı ki, Yaponiya millisi ideal formadadır?
– Tokio turniri həmişə yapon komandası üçün xüsusi əhəmiyyət daşıyır. Yarış evdə keçirilir və idmançılar böyük motivasiya ilə çıxış edirlər. Nəticə, şübhəsiz ki, təsirlidir, lakin mən yalnız bir starta əsaslanaraq nəticə çıxarmazdım. Biz düzgün istiqamətdə irəliləyirik, bu faktdır. Amma cüdo daim inkişaf edir, rəqabət getdikcə daha da sərtləşir. Bizim vəzifəmiz təkcə yüksək səviyyəni qorumaq deyil, həm də gələn ilin əsas çağırışlarına hazır olmaq üçün inkişafı davam etdirməkdir.
– Nəzərə alsaq ki, növbəti mövsümün əsas yarışı Bakıda keçiriləcək, heyətin konturları artıq müəyyənləşibmi?
– Bilirsiniz ki, Yaponiyada həmişə güclü idmançı seçimi var. Heyətin konturları doğrudan da formalaşmağa başlayır, lakin yekun qərarları yalnız beynəlxalq yarışlar seriyasının və daxili seçimlərin təhlilindən sonra veririk. Əsas prinsip obyektivlik və seçimdə dürüstlükdür. Yaponiya sistemi elə qurulub ki, tatamiyə həmin an ən güclü olan idmançı çıxır, titul və reqaliyalarından (rütbə, fəxri ad, nişan və ya yüksək statusu göstərən rəsmi atribut) asılı olmayaraq.
– Şübhəsiz ki, IJF-in idman direktoru vəzifəniz Bakıya səfərlərin tez-tez olacağı anlamına gəlir. Dünya çempionatının hazırlığında fəal iştirak etməyi planlaşdırırsınızmı?
– Bəli, əlbəttə. IJF-də beynəlxalq turnirlərin idman hissəsinə cavabdehəm və dünya çempionatı əsas layihələrdən biridir. Azərbaycan Cüdo Federasiyası ilə birlikdə turnirin ən yüksək səviyyədə təşkili üçün sıx əməkdaşlıq edirik. Bakı artıq dünya miqyaslı yarışların paytaxtı kimi özünü təsdiqləyib. Əminəm ki, dünya çempionatı təkcə region üçün deyil, bütün dünya cüdosu üçün parlaq hadisə olacaq.
– Azərbaycanda cüdosunun inkişafını necə qiymətləndirirsiniz? Sizcə, bizim məktəbi fərqləndirən nədir?
– Azərbaycan cüdo məktəbi güclü fiziki hazırlıqla yüksək emosional gərginliyi birləşdirir. Sizin idmançılar həmişə xarakter və qələbə iradəsi nümayiş etdirirlər – bunu həm gənclər səviyyəsində, həm də əsas milli komanda səviyyəsində görmək olar. Federasiyanın işini də qeyd edərdim: gənclərin sistemli hazırlanması, müasir məşq mərkəzləri, məşqçi heyətinə diqqətli münasibət. Azərbaycan stabil şəkildə cüdo üzrə ən güclü ölkələr sırasında yer alır və mənim fikrimcə, inkişaf potensialı çox yüksək olaraq qalır.
– Yaponiya həmişə Olimpiya çempionları ilə tanınıb. Tadahiro Nomura üç dəfə bu titulu qazanıb, Hifumi Abe isə Los-Ancelesdə üçüncü qələbəyə ümid edir. Sizcə, o, böyük həmyerlisini medalların sayına görə yaxalaya biləcəkmi?
– Nomuranın hekayəsi unikaldır. Üç Olimpiya qızılı – bu, istedadın, nəhəng zəhmətin və inanılmaz sabitliyin nəticəsidir. Hifumi Abe ən yüksək səviyyəli idmançıdır. Onun texniki arsenalı, çempion psixologiyası və böyük qələbə istəyi var. Üçüncü dəfə qalib gələ bilərmi? Bəli, bu mümkündür. Amma Olimpiya xüsusi turnirdir, burada hər saniyə görüşün taleyini dəyişə bilər. Ona sağlamlıq, aydın düşüncə və özünə inam arzulayıram. Qalanını o özü bacarır.
– Siz bütün həyatınızı cüdoya həsr etmisiniz. Bu gün cüdo sizin üçün nə ifadə edir?
– Mənim üçün cüdo sadəcə idman deyil. Bu, insanı formalaşdıran bir yoldur. O, hörmət, təvazökarlıq, məsuliyyət və özünü aşmaq bacarığını öyrədir. Cüdo mənə hər şeyi verib: dünyagörüşü, dostlar, cəmiyyətə xidmət etməyin mənası. Bu gün idarəetmə, idmanın inkişafı və gənc idmançıların dəstəklənməsi ilə məşğul olaraq, vaxtilə aldığımı geri qaytarmaq istəyirəm. Karyeram boyu son dərəcə motivasiyalı olmuşam və uğur qazanmağı çox istəmişəm. Cüdonun mənası mənim üçün sadəcə qazanmaq və ya uduzmaq deyil. O, daim özünü və cəmiyyəti təkmilləşdirmək, ona bacardığın hər şeyi verməkdir. Bu iki istiqaməti – özünü və cəmiyyəti inkişaf etdirməyi – cüdonun banisi Ciqoro Kano da vurğulayıb. Mən cüdo ilə məşğul olanda bu iki dəyər həmişə qəlbimdə olur.
Zəki Feyzullayev
