Idman.biz
Azərbaycan Cüdo Federasiyasının vitse-prezidenti Elnur Məmmədlinin "Report"a müsahibəsi
- Azərbaycan cüdoçuları Monteneqroda baş tutan Avropa çempionatını 1 gümüş və 4 bürünc medalla bitirdi. Nəticələri qənaətbəxş hesab etmək olar?
- Əlbəttə, gözəl nailiyyətdir. Ən əsası da odur ki, hər çəkidə medal qazandıq. Baxmayaraq ki, medalların əyarı gümüş və bürüncdür. Yeni adlar üzə çıxdı. Məsələn, Yusif Əhmədov (60 kq), Zelim Tçkayev (81 kq) ilk dəfə Avropa üçüncüsü oldular. Ötən il Elcan Hacıyev 90 kq-da Avropa çempionu titulunu qazanmışdı. Bu dəfə Murad Fətiyev eyni çəkidə üçüncü yeri tutdu. O, qəhrəmancasına güləşdi və zədələndi. Zelim Kotsoyev Olimpiya çempionumuzdur. Parisdə keçirilən Yay Olimpiya Oyunlarından sonra ilk yarışı idi. Finaldakı rəqibi isə olimpiadanın gümüş medalçısı idi. Gürcüstanlı cüdoçu olimpiadada finala qədər gəlibsə, deməli, güclüdür. Bu idmandır, biri udur, digəri uduzur. Əsas mübarizəni, yəni olimpiada kimi nəhəng yarışı biz qazanmışıq. Olimpiya çempionu, həm də vitse-prezident kimi deyə bilərəm ki, bu medal digərlərindən üstün və gözəldir. Zelim Avropa çempionatında ikinci olsa da, yaxşı mübarizə apardı.
- Amma qadın cüdoçular zəif nəticə göstərdilər…
- Qadın cüdoçular inkişafdadırlar. Bilirsiniz ki, "Qızlara ağ yaraşır" və sair kimi kampaniyalar keçiririk. Onları bu idman növünə cəlb etməyə çalışırıq. Düzdür, nəticə yoxdur, amma bu, son deyil. Ümid edirəm ki, növbəti yarışlarda bu çatışmazlıqlar aradan qalxacaq və qadın idmançılarımız dünya və Avropa çempionatlarında qızıl medal qazanaraq özlərini sübut edəcəklər. Təbii ki, bunun üçün zaman lazımdır.
- Baş məşqçi Rixard Trautman bu nəticələrdən sonra federasiyaya hesabat verib?
- Hesabat deyəndə, bu nəticələri gözəl nailiyyət kimi qiymətləndirirəm. Biri var bir çəkidə qızıl medal olsun və bununla da məsələ bitsin. Amma hər çəkidə medalın olması yaxşı nəticədir. Hələ Avropa çempionatında Hidayət Heydərov və Elcan Hacıyev güləşmədi. Güləşsəydilər, əlavə medallarımız da olacaqdı. Hidayət xəstəlik səbəbindən Avropa çempionatında iştirak edə bilmədi. Bizim üçün əsas məqsəd idmançının sağlamlığıdır. Bir yarışla həyat bitmir. Gələcəkdə turnirlərimiz olacaq.
- Ümumiyyətlə, Trautmanın yığmadakı işi ilə bağlı fikirləriniz necədir?
- Təbii ki, yaxşıdır. Trautman yaxşı məşqçi və performans direktorudur. Hər halda, yaxşıdır ki, bu gün işinə davam edir.
- Hidayət Heydərovun son durumu necədir?
- Yaxşıdır. Allahın köməyi ilə xəta-bəla olmasa, dünya çempionatında çıxış edəcək.
- Murad Fətiyevin zədə səbəbindən qarşıdan gələn dünya çempionatında iştirak edə bilməyəcəyi müəyyənləşib. Onun yoxluğunu ciddi itki hesab etmək olar?
- Şübhəsiz, son Avropa çempionatının üçüncüsüdür, güclü idmançıdır. Onun çıxış etməməsi bizim əlimizdə deyil. Lakin federasiya olaraq dərhal duruma müdaxilə etdik, hazırda müalicə alır. Əsas məqsəd 2028-ci ildə keçiriləcək olimpiadaya qədər komandanın tam püxtələşməsidir. Vaxtımız var, həvəsdən düşməyəcəyik. Fətiyevə ayrıca məşq proqramı veriləcək. Bərpa olduqdan sonra yığmaya qatılacaq.
- Dünya çempionatında şanslarımızı necə dəyərləndirirsiniz?
- Heç vaxt medal sayı deməmişəm, demərəm də. Çünki bu cüdodur və əvvəlcədən heç nəyi bilmək olmur. Digər idman növlərində 4 xal geridə olsan, yenidən hesabı bərabərləşdirmək mümkündür. Amma cüdoda çətin məsələdir. Hesabda öndə olan vaxt ipponla uduza bilərsən. Əlbəttə, hər bir idmançıdan yaxşı performans, qızıl medal gözləyirik. Həmçinin digər ölkələrin idmançıları da məşqlər edirlər, təhlillər aparırlar, hazırlaşırlar. İnanıram ki, milli üzvləri ölkəmizi layiqli şəkildə təmsil edəcəklər.
- Bir müddət öncə Avropa Cüdo İttifaqı tərəfindən Zelim Kotsoyev, Hidayət Heydərov və baş məşqçi Rixard Trautmanla yanaşı, siz də mükafata layiq görüldünüz. Bununla bağlı təəssüratlarınız necədir?
- Təbii ki, çox məmnunam və sevincliyəm. Bildiyiniz kimi, Hidayət Heydərov Avropanın ən güclü cüdoçusu seçildi. Ən yaxşı baş məşqçi isə Rixard Trautman oldu. Öz biliyimizi və dəstəyimizi idmançılardan əsirgəmirik. Çox şadam ki, Azərbaycanın cüdo yığması belə nailiyyətlər əldə edib. Mükafata o qədər də önəm vermirəm, əsas olan idmançılarımızın nailiyyətləridir.
İdman.biz
