Idman.biz
Avstriyanın Linz şəhərində keçirilən cüdo üzrə Qran-Prinin ikinci günündə yığmamız aktivinə daha iki medal yazdırıb.
Hər iki medalı cüdoçularımız -81 kq çəki dərəcəsində əldə edib. Vüsal Qələndərzadə gümüş, Ömər Rəcəbli bürünc mükafata layiq görülüb. Vüsal zədələndiyi final görüşündə Adilet Almata (Qazaxıstan) məğlub olub. Ömər isə üçüncü yer uğrunda qarşılaşmada finlandiyalı Eetu İhanamakiyə qalib gəlib.
Xatırladaq ki, ötən gün Ruslan Paşayev (-66 kq) yarışın qalibi olmuşdu.
Hesabında bir dəst medal olan Azərbaycan 59 ölkə arasında ümumi komanda sıralamasında üçüncü, kişilər arasında isə birinci pillədə qərarlaşıb.
21:43
Linz şəhərində keçirilən cüdo üzrə Yuxarı Avstriya Qran-pri turnirində 81 kq çəki dərəcəsində ölkəmizi təmsil edən Ömər Rəcəbli medal qazanıb.
Ömər Rəcəbli üçüncü yer uğrunda görüşdə finlandiyalı Eetu İhanamakiyə qalib gələrək Linz Qran-prisinin bürünc medalına yiyələnib.
18:44
Linz şəhərində keçirilən cüdo üzrə Yuxarı Avstriya Qran-pri turnirində 81 kq çəki dərəcəsində ölkəmizi təmsil edən Vüsal Qələndərzadə finala yüksəlib.
İdman.Biz bildirir ki, Qələndərzadə yarımfinalda finlandiyalı Eetu İhanamakiyə ipponla qalib gəlib.
81 kq çəki dərəcəsində çıxış edən digər idmançımız Ömər Rəcəbli isə təsəslliverici görüşdə monteneqrolu Yahya Nurkoviçə qalib gələrək bürünc medal uğrunda mübarizə aparmaq şansı qazanıb.
Daha öncə ¼ finalda Rəcəbli qazaxıstanlı Adilet Almata məğlub olmuşdu. Qələndərzadə isə dörddəbir final mərhələsində serbiyalı Mixaylo Siminə qalib gəlib.
09:37
Bu gün Avstriyanın Linz şəhərində keçirilən cüdo üzrə Qran-pri turnirinin ikinci günündə iki idmançımız tatamiyə çıxacaq.
İdman.Biz xəbər verir ki, bu barədə Cüdo Federasiyası məlumat yayıb.
Bildirilib ki, kişilər arasında 81 kq çəki dərəcəsində ölkəmizi Vüsal Qələndərzadə və Ömər Rəcəbli təmsil edəcək.
V.Qələndərzadə yarışa 1/32 final mərhələsindən başlayacaq. Onun rəqibi Yaponiyanı təmsil edən Takahiro Yamaşina olacaq.
Ö.Rəcəbli isə mübarizəyə 1/16 final mərhələsindən qoşulacaq. O, ABŞ idmançısı Yohan Silot ilə Macarıstan təmsilçisi Benedek Tot arasında keçiriləcək görüşün qalibi ilə qarşılaşacaq.
