Boks üzrə Ukrayna millisinin azərbaycanlı məşqçisi Heybət Qasımovun AZƏRTAC-a müsahibəsi

- Zəhmət olmasa, əvvəlcə özünüz barədə ətraflı məlumat verin…

- Mən 1959-cu il martın 15-də Quba rayonunun Xanəgah kəndində anadan olmuşam. Hərbi xidməti başa vurduqdan sonra 1982-ci ildə Ukraynanın paytaxtı Kiyev şəhərinə gəldim, burada İdman Akademiyasına daxil oldum. Akademiyanı bitirdikdən sonra isə məni iş və evlə təmin etdilər. Azərbaycanda isə Bakı Dövlət Rabitə və Nəqliyyat Kollecini bitirmişəm. Boks fəaliyyətimin əsas hissəsi Ukrayna ilə bağlı olub. Məşqçilikdən əvvəl özüm də boksla məşğul olmuşam.

- İdmançı və məşqçi kimi hansı uğurlara imza atmısınız?

- Boksçu kimi Ukrayna çempionatında iştirak etmişəm. Məşqçi kimi tələbələrim beynəlxalq yarışlarda uğurlu nəticələr qazanıblar. Yetirməm Elvin Əliyev 7 dəfə Ukrayna çempionu olub. Eyni zamanda, elitada ikiqat çempionluğa sahibdir. Hazırda Ukraynada ən tanınmış boksçulardan biridir.

- Azərbaycan Boks Federasiyasından kimlərlə əlaqəniz var?

- Hazırda gənclərdən ibarət yığmanın baş məşqçisi Yadigar Məmmədov, əsas millinin böyük məşqçisi Nəriman Abdullayev və Azərbaycan Boks Federasiyasının keçmiş prezidenti Ağacan Abıyevlə əlaqələrim var. Ağacan müəllimlə Mərakeşdə keçirilən turnir zamanı görüşmüşdüm.

- Bir az əvvəl yetirməniz Elvin Əliyevin Ukraynada uğurla çıxış etdiyini dediniz. Bəs, Ukraynada boksla məşğul olan başqa həmyerlilərimiz də varmı?

- Odessa şəhərində Azər Mustafayev ilə Nürəddin Əlibəyli kimi Əməkdar məşqçilər var. Hazırda olduqları şəhərin İdman Akademiyasında dərs deyirlər. Onlarla fəxr edirik. Ümumiyyətlə, Ukraynada yaşayan azərbaycanlılar arasında boksa maraq çoxdur. Hətta 2024-cü ildə Lvov şəhərində böyüklər arasında keçirilən ölkə çempionatında üç həmyerlimiz qızıl medal qazanıb.

- Sonuncu dəfə Azərbaycanda nə vaxt olmusunuz?

- 2012-ci ildə Bakıda keçirilmiş turnirdə iştirak etmişdik. Harada olmağımdan asılı olmayaraq, Azərbaycan mənim Vətənimdir. Sonuncu dəfə pandemiyadan öncə Bakıya səfər etmişdik. Qohumlarım orada yaşayır. Onlarla tez-tez əlaqə saxlayıram. Qardaşım isə Xaçmazda yaşayır.

- Ukrayna və Azərbaycan boksunu necə müqayisə edərdiniz?

- Əsas fərq maliyyə ilə bağlıdır. Məsələn, Ukraynanın bir çox idmançısı Serbiyadakı Gimnaziada İdman Oyunlarına öz hesabına getmişdi. Ukraynada müharibə şəraitində yaşasaq da, idmana maraq heç vaxt itmir. Azərbaycanda güləş və cüdo idman növləri yüksək səviyyədə inkişaf edir. Boks da nəticələr yaxşıdır. Açığı, rəqiblər Azərbaycan boksçularının adını eşidəndə qorxuya düşürlər.

- Ukrayna boksunun məşhur simaları olan Vitali və Vladimir Kliçko qardaşları ilə münasibətiniz varmı?

- Onlarla yox, amma məşqçiləri ilə yaxın dostam. Mənim evimə tez-tez gəlib-gedir. Kliçko qardaşları Ukrayna boksunun təməlini qoyublar. Hər ikisi həqiqətən də Ukrayna üçün böyük işlər görüb. Ukraynanın digər tanınmış boksçusu Aleksandr Usiklə isə yaxşı münasibətim var.

İdman.biz