Idman.biz
Azərbaycan MMA döyüşçüsü Suad Səlimova karyerasında yeni mərhələyə qədəm qoyur. Yaxın günlərdə o, Las-Veqasda UFC çempionu Merab Dvalişvili və azərbaycanlı döyüşçü Nazim Sadıxovla görüşərək ondan dəstək və motivasiya alıb.
Suad Səlimova İdman.biz-ə müsahibəsində planlarından, qarşıdakı döyüşdən və məqsədlərindən danışıb.
– Fevralda "Montpelye"də son döyüşünüzdə fransız rəqibinizi məğlub etdiniz. Ondan sonra karyeranızda nə dəyişdi və hazırda hansı hazırlıqları görürsünüz?
– Həmin döyüş mənim üçün vacib dönəm oldu. Qələbə mənə doğru yolda olduğumu göstərdi. İndi növbəti döyüşüm üçün "Montpelye"də hazırlaşıram. Bu döyüş mövsümü bağlamaq və 2026-cı ildə yeni səviyyəyə keçmək üçün böyük əhəmiyyət daşıyır.
– Las-Veqasda Merab Dvalişvili və Nazim Sadıxovla görüşünüz necə keçdi?
– Bu görüşlər mənim üçün çox qiymətli oldu. Merab əmək, disiplin və iradənin simvoludur, onun "özünə inan və sonuna qədər çalış" sözləri məni ruhlandırdı. Nazimlə söhbətimiz isə daha şəxsi xarakter daşıyırdı; biz həmvətənik və bu hiss mənim üçün çox təsirli oldu. Onun tövsiyələri diqqətimi toplamağa və düzgün qərarlar verməyə kömək etdi.
– UFC-nin Bakı turniri barədə nə düşünürsünüz?
– Bu, çox vacib addımdır. Azərbaycanın dünya arenasında ciddi qüvvə olduğunu göstərir. Döyüşə çıxanda Azərbaycan bayrağını qürurla qaldırıram. Bu, həm də ölkəmə olan sevgimin göstəricisidir.
– "Dəmir qız" ləqəbinə münasibətiniz necədir?
– Bu ləqəbi özüm seçmişəm. "Dəmir" möhkəmlik və iradənin simvoludur. Həyatda daha yumşaq ola bilərəm, amma döyüşdə güclü və qətiyyətliyəm. "Dəmir qız" mənim xarakterimi və döyüş ruhumu əks etdirir.
– Növbəti döyüşünüzdə əsas məqsədiniz nədir?
– Bu döyüş mənim üçün mövsümü bağlamaq və 2026-cı ilə hazırlıq baxımından əhəmiyyətlidir. İstəyirəm ki, bütün bacarıqlarımı və gücümü göstərim. Qələbə həm də il ərzində qazandığım təcrübəni tamamlayacaq.
– Qısa və uzunmüddətli məqsədləriniz hansılardır?
– Qısa müddətli məqsədim müntəzəm döyüşlərdə iştirak etmək və sabit qələbələr qazanmaqdır. Uzunmüddətli məqsədim isə böyük beynəlxalq təşkilatlarda döyüşməkdir. "UFC"də özümü sübut etmək istəyirəm. Mən bilirəm, çətin olacaq, amma mən "Dəmir qız"am və sonuna qədər gedəcəm.
– Azərbaycanda idmana dəstək və gələcək planlarınız nədir?
– Bakıda az sayda qadın MMA döyüşçüsü var. Hər birinin dəstəyi mənim üçün çox dəyərlidir.
Zəki Feyzullayev
