Report.az
Gənclər və İdman Nazirliyinin dəstəyi, Azərbaycan Karate Federasiyasının təşkilatçılığı və rəhbərliyi ilə şotokan karate üslubu üzrə XXXIII ölkə çempionatı keçirilib.
"Report" Azərbaycan karate Federasiyasının mətbuat xidmətinə istinadən xəbər verir ki, Abşeron Olimpiya İdman Kompleksində baş tutan yarışda Bakı, Sumqayıt, Naxçıvan Muxtar Respublikası, Gəncə, Şirvan, Qazax, Şəki, Ucar, Lənkəran, Salyan və digər regionlardan 400-ə qədər idmançı gücünü sınayıb.
Respublikanın müxtəlif bölgələrindən 30-a yaxın klub çempionatda iştirak edib.
Açılış mərasimində Azərbaycan Respublikasının Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad olunub. Tədbirdə Azərbaycan Karate Federasiyasının idarə heyətinin üzvü, şotokan karate üslubu üzrə rəhbər Elçin Mehdizadə, Azərbaycan Karate Federasiyası prezidentinin köməkçisi Vüsal Abdullazadə, idman ictimaiyyətinin tanınmış nümayəndələri, məşqçilər, hakimlər, idmançılar və idman azarkeşləri iştirak ediblər.
Qeyd edək ki, komanda hesabında "Qaraqaplan" İdman Klubu birinci, "Arpaçay" Karate Klubu ikinci, FHN - "Budokan" İdman Klubu isə üçüncü yerə layiq görülüb.
Karate Azərbaycan Karate Federasiyası Azərbaycan çempionatı
