Idman.biz
Azərbaycanlı döyüşçü Rafael Fiziyevin meneceri Sayat Abduraxmanov "Match TV"yə açıqlamasında bildirib ki, onun müştərisi üçün əsas məqsəd "UFC Fight Night" turnirində çilili İqnasio Bahamondesə qalib gəlməkdir. Daha sonra isə ilk "onluq"da yer alan istənilən güclü rəqiblə döyüşdə qələbə reytinqin 12-ci döyüşçüsünü yüngül çəki dərəcəsində titul mübarizəsinə qaytara bilər.
İdman.biz xəbər verir ki, Fiziyev iyunun 21-də Bakıda keçiriləcək UFC turnirində Bahamondeslə döyüşəcək.
Rəqib son üç qarşılaşmasını birinci raundda vaxtından əvvəl qələbə ilə başa vurub. Fiziyev isə ardıcıl üç məğlubiyyət alıb.
- Rafanın hazırlığı yaxşı keçib. Fiziki və mənəvi cəhətdən tam hazırdır. Ev turniri onun üçün əlavə motivasiyadır və bu baxımdan daha da açılışa bilər. Amma döyüş zamanı soyuqqanlı olmaq vacibdir. Tamaşaçının coşqusu ilə hərəkət etməməlidir. Əsas məqsəd Bahamondesə qalib gəlmək olmalıdır. İdeal variant – vaxtından əvvəl qələbədir, sadəcə döyüşmək xatirinə döyüşmək yox.
- Bahamondes son üç döyüşünü vaxtından əvvəl qazanıb. Sizcə onun əsas təhlükəsi nədədir?
- O, asan rəqib deyil. Fiziki göstəriciləri – boyu və qol uzunluğu ilə fərqlənir. Amma Rafa artıq UFC-nin Top-15-liyindədir və bu səviyyədə asan rəqiblə qarşılaşması qeyri-mümkündür. Bahamondes, belə deyək, döyüş üçün "yaxşı tərəfdaş"dır. Gözəl qarşılaşma ola bilər. Amma Rafa daha güclü və təcrübəli rəqiblərlə də döyüşüb. Bu dəfə təcrübə onun tərəfindədir.
- Qələbə Fiziyevi yenidən reytinqdə ilk "onluğ"a qaytaracaqmı?
- UFC ilə danışanda onlar bizdən sadəcə soruşdular: "Bakı turniri haqqında nə düşünürsünüz? Ən maraqlı və əyləncəli döyüş hansı olacaq?" Və nəticədə bu qərara gəldik ki, yaxşı və əyləncəli döyüş olacaq. bundan sonra o, əsas döyüşçülər sırasına qayıdacaq. UFC Rafanı sevir, ona müsbət yanaşır. Onun üçün maraqlı planlar hazırlayacaqlar.
- Amma üç məğlubiyyətdən əvvəl o, titula namizəd kimi görülürdü. İndi bu siyahıdan uzaqlaşıb. Yenidən titul yarışına qayıtması üçün neçə qələbə qazanmalıdır?
- İki qələbə – və o yenidən əsas namizədlər arasında olacaq. Bundan sonrası isə rəqibdən asılıdır. Əgər top səviyyəli bir rəqib qarşısına çıxsa, o zaman həmin döyüşdə qələbə Rafanı yenidən titul yarışına qaytaracaq.
- Fiziyevə indiki namizədlərdən Topuriya, yoxsa Oliveyra ilə döyüşmək daha uyğun olardı?
- Hazırda bu barədə danışmaq tezdir. İndiki əsas məsələ Bahamondesi uğurla keçməkdir. Ondan sonra çox maraqlı variantlar ola bilər.
- Bəs o, döyüş bacarığı baxımından Topuriya, Oliveyra və ya ilk "beşlik"dəki digər döyüşçülərdən geri qalırmı?
- Hər bir döyüşçünün öz üstünlüyü var. Topuriyanın boksu, Oliveyranın parteri hamıya təhlükə yarada bilər. Rafanın qeyri-adi duruş texnikası da hər rəqib üçün ciddi problemdir".
Qeyd edək ki, 32 yaşlı Rafael Fiziyev karyerası ərzində 12 qələbə, 4 məğlubiyyət alıb. 27 yaşlı İqnasio Bahamondesin isə MMA-da 17 qələbə və 5 məğlubiyyəti var.
İdman.biz
