Idman.biz
Orta çəki dərəcəsində IBF və WBO versiyaları üzrə hələlik qüvvədə olan dünya çempionu Janibek Alimxanulı ilə bağlı ən pis ehtimallar gerçəkləşib. B dopinq nümunəsinin nəticəsi də müsbət çıxıb.
İdman.Biz xəbər verir ki, A nümunəsində olduğu kimi, B nümunəsində də boksçunun orqanizmində meldonium aşkar olunub. Bu isə Alimxanulı üçün çempionluq kəmərlərinin itirilməsi və böyük ehtimalla azı bir il müddətinə diskvalifikasiya deməkdir.
Qazaxıstan Respublikasının Peşəkar Boks Federasiyasının prezidenti Rahimjan Erdenbekov məsələ ilə bağlı açıqlama verərək bildirib ki, ABŞ-dəki VADA laboratoriyasından daxil olan yekun ekspertiza 34 səhifəlik sənədlə təsdiqlənib və B nümunəsi də dopinq faktını rəsmiləşdirib. Onun sözlərinə görə, Janibek federasiyanın lisenziyalı boksçusu olduğu və son döyüş Astananın ev sahibliyi etdiyi gecədə keçirildiyi üçün hazırda iş federasiyanın yurisdiksiyasındadır. Əsas sual isə qadağan olunmuş maddənin qəsdən, yoxsa bilmədən qəbul edilib-edilməməsidir.
Mütəxəssislərin fikrincə, vəziyyət son dərəcə ağırdır və meldoniumun orqanizmə hansı yolla düşməsi yekun nəticəyə ciddi təsir göstərməyə bilər. Anti-dopinq qaydalarına əsasən əsas meyar maddənin aşkarlanması faktıdır. Maddənin bilərəkdən və ya bilmədən qəbul edilməsi peşəkar boks biznesində çox zaman fərq yaratmır.
Onun ən azı bir il diskvalifikasiya alması ehtimalı demək olar ki, yüz faizə yaxındır.
Çempionluq kəmərləri məsələsində də vəziyyət ümidverici deyil. Janibek yalnız WBO və IBF təşkilatlarının güzəştə getməsi halında titullarından birini və ya hər ikisini saxlaya bilər. Lakin bu ehtimal çox zəif qiymətləndirilir. Hər iki qurum dopinqə qarşı sərt mövqeyi ilə tanınır və titul uğrunda rəsmi iddiaçıların mövcudluğu da Alimxanulının xeyrinə deyil.
Ən ciddi sual isə başqa məqamla bağlıdır: Janibek Alimxanulı bu qalmaqaldan sonra karyerasını yüksək səviyyədə davam etdirə biləcəkmi. Ekspertlərin qənaətinə görə, iş necə başa çatmasından asılı olmayaraq, Alimxanulının üzərində dopinq qalmaqalı kölgəsi qalacaq.
