Idman.biz
Britaniyalı ağırçəkili boksçu Entoni Coşua Nigeriyada baş verən faciəvi yol qəzasından sonra ona dəstək olanlara təşəkkürünü bildirib.
İdman.Biz xəbər verir ki, hadisə 2025-ci il dekabrın 29-da Laqos-İbadan magistral yolunda baş verib. Coşuanın da içində olduğu avtomobil yol kənarında park edilmiş yük maşınına çırpılıb. Qəza nəticəsində boksçunun yaxın dostları və komandasının üzvləri Latif Ayodele (Latz) və Sina Qami həyatını itirib. Entoni Coşua isə müxtəlif dərəcəli xəsarətlər alaraq Laqos şəhərində yerləşən "Lagoon Hospital Ikoyi" xəstəxanasına çatdırılıb.
Paylaşımında Coşua "ömürlük qardaşının keşiyində" olduğunu vurğulayıb və hadisə yerinə ilk çatan xilasedicilərə, ona xəstəxanaya çatmaqda kömək edənlərə, eləcə də yerli sakinlərin dualarına xüsusi minnətdarlıq bildirib.
Boksçu "Lagoon Hospital Ikoyi"də çalışan həkim və tibb personalına göstərilən tibbi yardıma görə təşəkkür edib. O, həmçinin Böyük Britaniyanın Baş Komissarının müavini və Missiyanın müavin rəhbəri Saymon Fildin dəstəyini də qeyd edib.
Coşua paylaşımını belə yekunlaşdırıb:
"Sizin səyləriniz, xeyirxahlığınız və dəstəyiniz heç vaxt unudulmayacaq".
