Idman.biz
Hövsan Olimpiya İdman Kompleksində Bakı üzrə kikboksinq çempionatı başa çatıb.
Yarışın nəticələrini barədə İdman.Biz-ə Azərbaycan Kikboksinq Federasiyasının birinci vitse-prezidenti Elşən Abdulrəhimov danışıb.
"Bu turnir Bakı İdman Klubunun dəstəyi ilə təşkil olundu və ilk növbədə kütləviliyi ilə yadda qaldı. Paytaxt çempionatında 613 idmançı iştirak etdi, onlardan 100-dən çoxu qadın idi. Düzünü desəm, bu mənim üçün xoş sürpriz oldu, çünki hər valideyn qızını döyüş idman növünə yönləndirməyə razı olmur", – deyə Federasiya rəsmisi bildirib.
Elşən Abdulrəhimov qeyd edib ki, kikboksinq ölkədə qadınların ən çox cəlb olunduğu döyüş idman növlərindən biridir: "Sevindirici haldır ki, bu idman növündə qadınların iştirakı ilə bağlı heç vaxt problem olmayıb".
O əlavə edib ki, turnirdə həm böyüklər, həm də gənc yaş qrupları üzrə yarışlar keçirilib və bu, kikboksinqə marağın yüksək olduğunu bir daha göstərib.
